Нукусда ноқонуний қурилган телефон дўкони буздирилди
Суд қарорига кўра, қурилмани мажбурий буздириш ва ер майдонини дастлабки ҳолатга келтириш белгиланган.
Нукус шаҳар марказий бозори олдида жойлашган телефон ва аксессуарлар сотиш дўкони Фуқаролик ишлари бўйича Нукус туманлараро суди томонидан ноқонуний қурилган қурилма деб топилиб, суднинг 2025 йил 27 ноябрь кунги қарорига асосан ушбу қурилмани мажбурий буздириш ва ер майдонини дастлабки ҳолатга келтириш белгиланган.
Ушбу қарор бўйича чиқарилган ижро ҳужжат Мажбурий ижро бюроси Нукус шаҳар бўлими иш юритувига келиб тушиб, бўлим давлат ижрочиси томонидан ижро ҳаракатларига киришилган.
Жумладан, жавобгарга ноқонуний қурилмаларни ўз ҳисобидан бузиши лозимлиги, суд қарори ижросини таъминламаслик оқибатлари ҳақида бир неча маротаба тушунтириш ва огоҳлантиришлар берилган.
Шунга қарамасдан, жавобгар томонидан ноқонуний қурилмалар ихтиёрий равишда бартараф этилмаган. Шу сабабли ноқонуний қурилмалар мутасадди ташкилотлар иштирокида жорий йилнинг 7 май куни тегишли тартибда мажбурий бартараф этилган.
