“Одамлар ҳафталаб сарсон бўлмоқда”: Сенатор банкоматлар билан боғлиқ муаммога тўхталди

Сенатнинг Мудофаа ва хавфсизлик масалалари қўмитаси масалалари қўмитаси раиси Қутбиддин Бурхонов банкоматлар билан боғлиқ техник муаммолар фуқаролар орасида жиддий норозилик уйғотаётганини билдирди.

 

Сенаторга кўра, айрим банкоматларда мижоз ҳисобидан маблағ ечилган бўлса-да, нақд пул берилмаслиги ёки карта қурилмада қолиб кетиши ҳолатлари юзага келмоқда. Уларнинг муаммоларини ҳал этадиган тезкор механизмлар эса амалда жорий этилмаган. Бу бўйича нафақат банкларга, балки ички ишлар бўлимларига ҳам кўплаб мурожаатлар келиб тушаётгани қайд этилди.

 

“Энг ёмони, минглаб одамлар банкоматлардан пул ечиб олишдаги техник камчиликлар сабабли ҳафталаб сарсон бўлишмоқда”, деди Сенатор.

 

Андижонда сайловчилар мурожаатлари асосида ўтказилган қисқа муддатли ўрганишлар ҳам ушбу муаммолар мавжудлигини тасдиқлаган. Кейинги таҳлиллар эса муаммонинг кўлами анча кенг эканини кўрсатган.

 

Маълумотларга кўра, 2025 йилда мамлакат бўйлаб банкоматлардан пул ечиш жараёнида 290 минг ҳолатда турли носозликлар қайд этилган.

 

Шу ҳолатларнинг мингдан ортиғи бўйича фуқаролар тезкор ёрдам сўраб мурожаат қилган бўлса-да, уларни ҳал этиш учун зарур сервис механизмлар ҳали тўлиқ йўлга қўйилмаган.

 

Шунингдек, мурожаатларнинг кўриб чиқилиш муддатлари ҳам турлича бўлиб, 290 минг мурожаатдан 97 минг таси 2–3 иш кунида, 22 минг таси 4–6 иш кунида, 9700 таси 7–15 иш кунида ҳал этилган. Қарийб 10 минг ҳолатда эса мурожаатлар 15 кундан ортиқ вақт давомида кўриб чиқилган.