Президент фаолиятига бағишланган “Юрт қайғусида 365 кун” китоби тақдимоти бўлиб ўтди
Нашр 2025 йил давомида амалга оширилган воқеаларни хронологик тартибда акс эттиради.
Контент тайёрлаш марказида “Юрт қайғусида 365 кун” китобининг тақдимоти бўлиб ўтди.
Тадбирда мамлакатнинг ижодкор зиёлилари, жамоат арбоблари, кенг жамоатчилик вакиллари ҳамда оммавий ахборот воситалари ходимлари иштирок этди.
Мазкур нашр Шавкат Мирзиёевнинг 2025 йил давомида давлат бошқаруви, халқаро дипломатия, иқтисодий ислоҳотлар, ижтимоий ҳимоя, экология, таълим ва маданият соҳаларидаги фаолиятини ҳужжатли манбалар, таҳлилий шарҳлар ҳамда фотолавҳалар асосида жамлаган кенг қамровли тўплам ҳисобланади.
Китобда Ўзбекистонда амалга оширилаётган ислоҳотларнинг тарихий кўлами, давлат бошқарувидаги янги ёндашувлар ҳамда “инсон қадри” тамойилига асосланган тараққиёт модели ўз ифодасини топган.
Нашрда иқтисодий ўсиш, инвестицион фаоллик, экспорт ҳажмининг ортиши, камбағалликни қисқартириш, бандликни таъминлаш, “яшил иқтисодиёт”ни ривожлантириш ҳамда халқаро ҳамкорликни мустаҳкамлашга оид жараёнлар батафсил ёритилган. Шунингдек, китобда давлат раҳбарининг ҳудудларга ташрифлари, халқ билан очиқ мулоқотлари, халқаро саммитлардаги иштироки, стратегик ташаббуслари ва муҳим қарорлари изчил баён этилган.
Нашр йил давомида содир бўлган воқеаларни хронологик тартибда, ойлар кесимида тизимли равишда ёритади ҳамда қўшимча маълумотлар, статистик кўрсаткичлар ва ҚР-кодлар орқали бойитилган.
“Юрт қайғусида 365 кун” китоби сиёсатшунослар, тарихчилар, тадқиқотчилар, журналистлар ҳамда кенг китобхонлар оммаси учун муҳим манба сифатида хизмат қилади.
