Сурхондарёда Иккинчи жаҳон урушининг сўнгги қатнашчиси 105 ёшида вафот этди
Меҳнат фахрийси бўлган марҳум Шоҳимардон Ҳамроев Воронеж, Латвия, Литва ва Эстония ҳудудларини озод қилишда муносиб ҳисса қўшган.
Шоҳимардон Ҳамроев Бойсун туманининг Темирдарвоза маҳалласида 105 ёшида вафот этди.
Шоҳимардон ота Иккинчи жаҳон уруши йилларида Воронеж, Латвия, Литва ва Эстония ҳудудларида кечган жангларда иштирок этган. У уруш давридаги оғир синовларни матонат билан енгиб ўтган, Ватан олдидаги бурчини сидқидилдан адо этган фидойи инсон сифатида ёдда қолади.
Урушдан сўнг у бутун умрини таълим соҳасига бағишлаб, педагогика йўналишида таҳсил олган ҳамда қарийб 40 йил давомида рус тили фани ўқитувчиси сифатида фаолият юритган. Шу давр мобайнида юзлаб шогирдларга таълим ва тарбия берган.
Шоҳимардон ота Ҳамроев меҳнат фаолияти давомида “Ўзбекистон Республикаси халқ таълими аълочиси” кўкрак нишони билан тақдирланган.
У Сурхондарё вилоятида ҳаёт бўлган сўнгги Иккинчи жаҳон уруши қатнашчиси эди.
