Турклар Эрондан ҳам ёмонроқ аҳволга тушади — Исроил маданият вазири
Мики Зоҳар “Туркияга душман давлат сифатида муомала қилишни бошлаш лозим” деган мазмундаги фикрни ҳам илгари сурган.
Исроил маданият вазири Мики Зоҳар Туркияга қарата кескин баёнот бериб, агар Анқара Исроил билан қарама-қарши йўлни танласа, оғир оқибатларга дуч келишини айтди. У бу фикрларини телевизион дастурдаги чиқиши давомида билдирган. Бу ҳақда Yeni Şafak ёзмоқда.
Маълум қилинишича, Зоҳар ўз чиқишида Туркия президенти Режеп Таййип Эрдоғаннинг Исроил сиёсатига оид баёнотларига ҳам муносабат билдириб, Анқаранинг позициясини “душман ёндашуви” сифатида баҳолаш кераклигини айтди. У “Туркияга душман давлат сифатида муомала қилишни бошлаш лозим” деган мазмундаги фикрни ҳам илгари сурган.
Вазир, шунингдек, Туркия ва Эронни ҳам қиёслаган.
“Эрдоған Исроилга келиб, уни забт этиш учун армия тузмоқчи эканини айтмоқда, буни синаб кўришлари мумкин. Худди шундай фикрда бўлган эронликлар ҳам бор эди, ҳозир уларнинг аҳволига қаранг. Агар турклар ҳам шундай йўл тутса, янада оғирроқ вазиятга тушиб қолади”, — деган.
У Ғазо масаласига тўхталиб, Исроил армияси ҳақидаги даъволарга ҳам муносабатини билдирган.
Ғазода 80 мингдан ортиқ тинч аҳоли ҳалок бўлганига оид айбловлар фонида Зоҳар Исроил армияси тинч аҳолига зарар етказмаётганини таъкидлаб: “Туркия бизни фаластинликларга зулм қилаётган босқинчи сифатида кўрсатмоқчи, лекин бу нотўғри. Биз дунёдаги энг ахлоқли армияга эгамиз”, — деган.
