Ўзбекистонда жарима баллари 12 баллдан ошган ҳайдовчилар сони 107 нафарга етди
Эндиликда улар ҳайдовчилик ҳуқуқидан суд тартибида маҳрум этилади. Қайта имтиҳон эса 50 та саволдан иборат бўлади.
Ўзбекистонда жарима баллари 12 баллдан ошган ҳайдовчилар сони 107 нафарга етди. Бу ҳақда Йўл ҳаракати хавфсизлиги хизмати ахборот хизмати маълум қилди.
Қайд этилишича, эндиликда ушбу ҳайдовчилар суд тартибида ҳайдовчилик ҳуқуқидан маҳрум қилинади. Шундан сўнг улар мажбурий ўқув курсларида қатнашиб, қайта назарий ва амалий имтиҳон топшириши талаб этилади.
Янги тартибга кўра, назарий имтиҳон одатдагидек 20 та эмас, 50 та саволдан иборат бўлади. Имтиҳондан ўтиш учун ҳайдовчи камида 46 та саволга тўғри жавоб бериши шарт.
1 май куни жарима баллари 12 баллдан ошган илк ҳайдовчи аниқланган эди. 8 май ҳолатига кўра, бундай ҳайдовчилар сони 49 нафарни ташкил қилган.
Эслатиб ўтамиз, 2025 йил 1 июндан бошлаб йўл-патруль хизмати ходимлари томонидан Маъмурий жавобгарлик тўғрисидаги кодекснинг 12 та моддаси асосида расмийлаштирилган баённомалар учун жарима баллари ҳисобланмоқда.
Шунингдек, 2026 йилнинг 1 апрелидан эса қоидабузарликларни автоматик равишда аниқловчи қурилмалар томонидан аниқланган қоидабузарликлар учун ҳам жарима баллари қўлланиши бошланган. Улар қаторига светофорнинг тақиқловчи ишорасига бўйсунмаслик, тўхташ ва тўхтаб туриш қоидаларини бузиш, йўлнинг қарама-қарши бўлагида ҳаракатланиш ва тезлик қоидаларига амал қилмаслик каби қоидабузарликлар киради.
