Афғонистонда қизларнинг 12 ёшида турмушга чиқиши қонунийлаштирилди
Толибон вояга етмаганлар ўртасидаги никоҳни тан оладиган янги оилавий қонунни қабул қилди.
Афғонистонда қизлар 12 ёшида турмушга чиқишлари мумкин ва бундай никоҳни бекор қилиш деярли имконсиз, деб хабар беради focus.ua.
Толибон маъмурияти томонидан оила ва никоҳ муносабатларини тартибга солувчи янги қонун қабул қилинди. “Турмуш ўртоқларни ажратиш тамойиллари” деб номланган 31 моддадан иборат ҳужжат Толибон етакчиси томонидан тасдиқланган.
Қонунда никоҳни бекор қилиш, бедарак йўқолган шахслар, диндан қайтиш, мажбурий ажралиш, эмизиш ҳамда бошқа оилавий-ҳуқуқий муносабатларни тартибга солувчи қоидалар белгиланган.
Ҳужжатнинг энг кўп муҳокама қилинаётган жиҳатларидан бири вояга етмаганлар никоҳи билан боғлиқ нормалардир. Қонунга кўра, агар вояга етмаган бола (ўғил-қиз) қариндошлар ўртасида турмуш қурса, агар эр-хотин ижтимоий жиҳатдан мос деб ҳисобланса ва маҳр мос бўлса, никоҳ шартномаси қонуний кучга эга деб ҳисобланади.
Шунингдек, ҳужжатда никоҳни бекор қилиш масаласи ҳам тартибга солинган бўлиб, вояга етмаганлар балоғат ёшига етгандан сўнг никоҳни бекор қилишни талаб қилиши мумкинлиги қайд этилган. Аммо бундай никоҳни бекор қилиш деярли имконсиз, чунки бу иш Толибоннинг диний суди томонидан кўриб чиқилади.
Қонунга мувофиқ, оилавий масалаларда васийларнинг ваколатлари сақланади ва айрим ҳолларда кенгайтирилади. Шунингдек, никоҳга розилик, диний-ҳуқуқий низолар ҳамда эр-хотин ўртасидаги келишмовчиликларни кўриб чиқиш тартиблари ҳам белгиланган.
