Андижон ва Исломободда Заҳириддин Муҳаммад Бобурга ҳайкал қўйилади

Президент Шавкат Мирзиёев турли соҳалардаги бунёдкорлик лойиҳалари тақдимоти билан танишди. Бу ҳақда Президент матбуот хизмати хабар берди.

 

Маълум қилинишича, Давлат раҳбарига Андижон вилояти Бобур шаҳрида барпо этилиши режалаштирилаётган меъморий ансамбль таркибида буюк давлат арбоби, саркарда ва шоир Заҳириддин Муҳаммад Бобурга бағишланган ҳайкал лойиҳаси тақдим этилди.

 

 

Буюк аждод хотирасини муносиб улуғлаш, унинг бой илмий-адабий мероси, давлатчилик тафаккури ҳамда жаҳон цивилизациясига қўшган ҳиссасини ёш авлодга чуқур етказиш мақсадида ёдгорлик алоҳида мазмун ва бадиий ечим асосида яратилмоқда.

 

Президентга ҳайкалнинг эскизлари, композицион ечимлари ва Бобур сиймосини акс эттиришга оид илмий-бадиий ёндашувлар ҳақида ахборот берилди. 

 

 

Қайд этилишича, тарихий шахс образи ўзбекистонлик олимлар томонидан хорижий ҳамкасблар билан ҳамкорликда олиб борилган тадқиқотлар, тарихий манбалар, қўлёзмалар, миниатюралар ва маданий мерос намуналарини чуқур ўрганиш асосида ишлаб чиқилмоқда.

 

Шунингдек, Президентнинг Покистонга давлат ташрифи доирасида Исломобод шаҳридаги боғлардан бирига Заҳириддин Муҳаммад Бобур номи берилгани эслатилди. Ушбу боғда ҳам буюк аждодга бағишлаб ўрнатилиши режалаштирилган ҳайкал лойиҳаси кўриб чиқилди.

 

 

Давлат раҳбари ёдгорликларда Бобур сиймосини нафақат буюк адиб ва шоир, балки моҳир саркарда, қудратли давлат асосчиси ва донишманд ҳукмдор сифатида теран очиб бериш муҳимлигини таъкидлади. Ҳайкалнинг умумий қиёфасида унинг иродаси, давлатчилик салоҳияти, юксак маънавияти ва бунёдкорлик ғоялари яққол ифода топиши лозимлиги қайд этилди.

 

Тақдимот давомида Президентга Абу Райҳон Беруний номидаги халқаро мактаб-интернати моддий-техник базасини такомиллаштириш, Бухоро шаҳрида туризм ва транспорт инфратузилмасини ривожлантириш, шунингдек, туманлардаги маданият уйларини модернизация қилиш бўйича ишлаб чиқилаётган лойиҳалар ҳақида ҳам ахборот берилди.

 

Якунда давлат раҳбари лойиҳаларни янада такомиллаштириш ҳамда илғор тажриба асосида пухта ишлаб чиқиш юзасидан тегишли кўрсатмалар берди.