“Йилнинг энг яхши тарбиячиси – 2026” касбий кўрик-танлови ғолиблари тақдирланди
Бугунги кунда мамлакат бўйлаб 39 мингдан ортиқ мактабгача таълим ташкилотлари фаолият юритмоқда.
Муҳаммад Ал-Хоразмий номидаги ихтисослаштирилган мактабда “Йилнинг энг яхши тарбиячиси – 2026” касбий кўрик-танловининг тантанали тақдирлаш маросими бўлиб ўтди.
Тадбирда Ўзбекистон мактабгача ва мактаб таълими вазири Каримова Эъзозхон Ғопиржоновна иштирок этиб, барча қатнашчилар ва ғолибларни ушбу қувончли кун билан самимий муборакбод этди. Вазир ўз нутқида тарбиячиларнинг ёш авлод тарбиясидаги ўрни беқиёс эканини таъкидлаб, бугунги кунда мамлакат бўйлаб 39 мингдан ортиқ мактабгача таълим ташкилотлари фаолият юритаётганини маълум қилди.
Шунингдек, тадбирда ўзбек эстрадасининг таниқли вакиллари — Нилуфар Усмонова ҳамда Ҳамдам Собиров ҳам иштирок этиб, маросимга байрамона кайфият улашди.
Манбаларга кўра, мазкур танлов тарбиячиларнинг касбий маҳорати, ижодий ёндашуви ҳамда таълим-тарбия жараёнидаги илғор тажрибаларини оммалаштириш мақсадида ташкил этилди. Танлов давомида иштирокчилар турли шартлар асосида ўз билим ва салоҳиятларини намоён этди.
Якунда ғолиб ва фаол иштирокчилар диплом ҳамда эсдалик совғалари билан тақдирланди. Тадбир кўтаринки руҳда ўтиб, барчага эзгу тилаклар билдирилди.
