Исроил Эронга қарши янги операция ўтказишга тайёрланмоқда — CNN
Тел-Авивда Теҳрон дипломатик паузадан фойдаланиб вақт ютишга уринмоқда деган хавотир кучаймоқда.
Исроил сиёсий раҳбарияти орасида Эронга қарши ҳарбий операцияларни тез орада қайта бошлаш тарафдори эканлиги ҳақидаги фикр тарқалмоқда, деб хабар берди СNN 21 май куни Исроил ҳукумати манбаларига таяниб.
Маълум қилинишича, Теҳрон дипломатик паузадан фойдаланиб вақт ютишга уринмоқда деган хавотир Тел-Авивда кучайган. Шу сабабли Исроил ҳукуматининг юқори доираларида Эронга қарши ҳарбий ҳаракатларни қайта тиклаш истаги сақланиб қолаётгани таъкидланган.
Манбаларга кўра, яқинда АҚШ президенти Доналд Трамп ва Исроил бош вазири Бенямин Нетаняху ўртасида телефон орқали бўлиб ўтган суҳбат кескин руҳда ўтган. Хабарда қайд этилишича, Нетаняху ҳозирги дипломатик пауза фақат Эрон манфаатларига хизмат қилмоқда деб ҳисобламоқда.
Аввалроқ Доналд Трамп Қатар, БАА ва Саудия Арабистони илтимосига биноан Эронга қарши эҳтимолий ҳарбий ҳаракатларни вақтинча кечиктиришга қарор қилганини билдирган эди. АҚШ раҳбари, шунингдек, Эрон билан дипломатик келишувга эришиш имконияти сақланиб қолаётганини ҳам таъкидлаган.
