Афғонистонда тошқинлар оқибатида 24 киши ҳалок бўлди
Март ойининг охиридан буён мамлакатда кузатилаётган кучли ёғингарчилик сув тошқинлари ва кўчкиларга сабаб бўлмоқда.
Афғонистонда кучли ёмғир ва сув тошқинлари оқибатида сўнгги 48 соат ичида камида 24 киши ҳалок бўлди. Бу ҳақда Arab News хабар берди.
Маълумотларга кўра, охирги бир сутка давомида мамлакат шимолидаги Бағлон вилоятида 15 киши, шимоли-шарқдаги Бадахшон вилоятида икки киши ва марказий Вардак вилоятида бир киши сел оқимлари оқибатида ҳалок бўлган.
Бағлон вилояти губернатори матбуот котиби, сув тошқинлари оқибатида ўнлаб одамлар жароҳатланганини маълум қилди.
Бадахшон вилоятидаги маҳаллий расмийларга кўра, икки киши бедарак йўқолган, 100 дан ортиқ турар жой вайрон бўлган.
Чоршанба кунидан буён давом этаётган кучли ёмғирлар Афғонистоннинг бир қатор ҳудудларида сув тошқинларини юзага келтирган. Пайшанба куни мамлакатнинг бошқа вилоятларида ҳам яна олти киши ҳалок бўлгани хабар қилинди.
Афғонистоннинг табиий офатларни бошқариш миллий бошқармаси вакилининг айтишича, сўнгги 24 соат ичида 11 киши жароҳат олган.
Март ойининг охиридан буён мамлакатда кузатилаётган ноқулай об-ҳаво сув тошқинлари ва кўчкиларга сабаб бўлиб, уй-жойлар ҳамда қишлоқ хўжалиги майдонларига катта зарар етказмоқда.
Апрель ойида ҳам Афғонистонда кучли ёмғир ва сув тошқинлари оқибатида камида 148 киши ҳалок бўлган, 137 киши жароҳатланган.
Мутахассислар Афғонистон инфратузилмасининг заифлиги ва иқлим ўзгариши экстремал об-ҳаво ҳодисаларининг кўпайишига сабаб бўлаётганини таъкидламоқда.
