“Охиригача курашинг”: Президент терма жамоага мурожаат қилди
Шавкат Мирзиёев футболчиларни ҳеч кимдан ҳайиқмасдан, босимсиз ўйнашга чақирди.
Президент Шавкат Мирзиёев футбол бўйича Ўзбекистон миллий терма жамоаси билан учрашувда футболчиларни жаҳон чемпионати олдидан қўллаб-қувватлаб, уларни босимсиз ва мардонавор ўйнашга чақирди.
Давлат раҳбари мундиалда осон ўйин бўлмаслигини таъкидлаб, Ўзбекистон терма жамоаси Португалия, Колумбия ва Конго каби кучли жамоаларга қарши майдонга тушишини қайд этди.
Президент халқ ҳар бир учрашувда ғалаба кутиши табиийлигини, бироқ футболчилар тарихий натижага аллақачон эришиб бўлганини таъкидлади.
“Сизлар тарихни аллақачон яратиб бўлдингиз”, — деди Шавкат Мирзиёев.
Давлат раҳбари футболчилардан олдиндаги муҳим ўйинларда ортиқча босимсиз, ҳеч кимдан ҳайиқмай, бор имкониятларини ишга солиб ўйнашни сўради.
“Ҳар бир тўп, ҳар бир вазият, майдоннинг ҳар бир қаричи учун охиригача курашинг!” деди Президент.
Президентнинг таъкидлашича, мундиал учрашувларида фан-клублар, минглаб мухлислар ҳамда АҚШдаги ватандошлар стадионлардан туриб терма жамоани қўллаб-қувватлайди.
Давлат раҳбари, шунингдек, жамоанинг ҳар бир ҳаракатини қарийб 40 миллион аҳолининг катта ҳаяжон билан кузатишини билдириб, футболчиларга халқ ва давлат раҳбари уларга ишонишини айтди.
“Боринглар, мардонавор ўйнанглар, Ватан шарафини муносиб ҳимоя қилинглар”, — деди Шавкат Мирзиёев сўзининг якунида.
