Самарқандда МИБ орқали қидирувдаги машина топилиб, жарима майдончасига жойлаштирилди
Маълум бўлишича, фуқаро қарзини тўламасдан, ўзига тегишли “Mercedes Benz”ни яқинларига тегишли манзилларда яшириб юрган.
Мажбурий ижро бюроси Самарқанд вилоят бошқармаси Қидирув шўъбаси ходимлари томонидан олиб борилган тезкор тадбирлар натижасида банк фойдасига ундирилиши лозим бўлган қарздорлик билан боғлиқ навбатдаги ижро ҳаракати таъминланди.
Маълум бўлишича, Самарқанд шаҳрида яшовчи фуқаро С.Т.дан микромолия ташкилоти фойдасига 6,6 миллион сўм қарздорликни ундириш белгиланган бўлиб, унга тегишли “Mercedes Benz 200” русумли автотранспорт воситасига қидирув эълон қилинган.
Тезкор тадбирлар давомида қарздор автотранспорт воситасидан доимий равишда фойдаланмасдан, уни яқинларига тегишли манзилларда сақлаб юргани аниқланган. Шу боис транспорт воситасининг аниқ жойлашувини белгилаш мақсадида бир неча манзиллар ўрганиб чиқилди.
Олиб борилган қидирув ишлари натижасида автомашина навбатдаги яширин сақланаётган манзилдан топилди. Натижада транспорт воситаси белгиланган тартибда хатланиб, жарима майдончасига жойлаштирилди. Тезкор қидирув тадбирлари давом этмоқда
