“Сифатли давлат бошқаруви” дастурида энг намунали ходимлар аниқланди

 

Президент Шавкат Мирзиёев раислигида ўтган “Сифатли давлат бошқаруви” дастури доирасидаги форум ва тақдирлаш маросимида давлат хизматчилари ўртасида энг намунали ходимлар аниқланиб, ғолиблар эълон қилинди.

Танлов натижаларига кўра, Тоғ-кон саноати ва геология вазирлиги бошқарма бошлиғи Мақсуд Болибеков энг намунали раҳбар ходим, Олий таълим, фан ва инновациялар вазирлиги бўлим бошлиғи Фазлиддин Мўминов энг намунали маъмурий ходим, Ўзатом агентлиги бош мутахассиси Шохмирзо Умаров энг намунали мутахассис ходим сифатида эътироф этилди.

Шунингдек, Камбағалликни қисқартириш ва бандлик вазирлиги вазири маслаҳатчиси Умматой Йўлдошева энг намунали аёл ходим, Олий таълим, фан ва инновациялар вазирлиги лойиҳа офиси раҳбари Акбархон Собирхонов энг намунали истеъдодли ёш ходим, Адлия вазирлиги бўлим бошлиғи Мирсаид Рахматов эса инсон ресурслари бўйича энг намунали ходим сифатида тақдирланди.

Давлат раҳбари барча ғолибларнинг лавозимини бир поғона кўтариш ва уларни раҳбар кадрлар захирасига киритишни таклиф қилди. Уларнинг касбий салоҳияти, инновацион ёндашуви ва доимий ўз устида ишлаши бошқа ходимлар учун намуна экани алоҳида таъкидланди.

Президент, шунингдек, келгусида самарадорлиги паст бўлган давлат идоралари номи ҳам очиқ эълон қилинишини маълум қилди.

“Сифатли давлат бошқаруви” дастури эндиликда ҳар икки йилда ўтказилиб, келгуси босқичларда маҳаллий ҳокимликлар ҳам танлов жараёнига жалб этилиши белгиланди.

Тадбир якунида давлат хизматчиларини тақдирлаш маросими бўлиб ўтди.