“Сифатли давлат бошқаруви” форумида энг намунали вазирликлар эълон қилинди
Форумда Адлия, Тоғ-кон саноати ва геология ҳамда Ички ишлар вазирликлари энг намунали вазирлик сифатида эътироф этилди.
Президент Шавкат Мирзиёев “Сифатли давлат бошқаруви” дастури бўйича форум ва тақдирлаш маросимида нутқ сўзлаб, мамлакатда амалга оширилаётган ислоҳотлар марказида инсон қадри ва халқ манфаатлари устувор ўрин тутаётганини таъкидлади.
Форум давомида давлат бошқаруви тизимига илғор ва замонавий ёндашувларни жорий этиш борасида амалга оширилаётган ишлар ҳақида ҳам сўз юритилди. Хусусан, Бирлашган Араб Амирликлари билан давлат бошқаруви йўналишидаги ҳамкорлик янги босқичга чиққани алоҳида таъкидланди.
Президент “Сифатли давлат бошқаруви” дастурини амалга оширишдаги кўмаги учун Амирликлар раҳбарияти ҳамда Ҳукумат ишлари бўйича вазири Моҳаммад Ал Гергавига миннатдорлик билдирди.
Танлов натижаларига кўра, Адлия вазирлиги “Ўзбекистон – 2030” стратегиясини амалга ошириш бўйича энг намунали вазирлик деб топилди. Қайд этилишича, вазирлик бугунги кунда 30 та платформа орқали 380 та тўлиқ рақамлаштирилган хизматни тақдим этмоқда ва 780 дан ортиқ хизматдан онлайн фойдаланиш имконияти яратилган.
Шунингдек, Тоғ-кон саноати ва геология вазирлиги ресурсларни бошқариш бўйича энг намунали вазирлик сифатида эътироф этилди. Вазирлик томонидан геология-қидирув ишларида сув сарфи 20 фоизга қисқартирилгани ва асосий ускуналарни маҳаллийлаштириш даражаси 84 фоизга етказилгани қайд этилди.
Ички ишлар вазирлиги эса давлат хизматларини кўрсатишдаги ижобий натижалари учун энг намунали вазирлик деб топилди. Ҳозирда вазирлик томонидан кўрсатилаётган хизматларнинг 95 фоизи тўлиқ рақамли шаклга ўтказилгани маълум қилинди.
