Сурхондарёда солиқ қарзлари сабаб машиналар хатланмоқда
Жумладан, Қумқўрғонда “Volkswagen”, “Howo” ва 2 та “BYD” автомашинлари қарздорлик эвазига хатланди.
Солиқларни ўз вақтида тўлаш давлат ва жамият тараққиёти, пенсия, нафақа ҳамда ижтимоий ҳимоя тўловларини таъминлашда муҳим аҳамиятга эга. Солиқ қарздорлигини ўз вақтида бартараф этмаслик эса жарима ва мол-мулкни хатловга олиш каби чекловларга сабаб бўлиши мумкин.
Мажбурий ижро бюроси ҳамда солиқ хизмати органлари томонидан Қумқўрғон туманида ўтказилган тадбирлар давомида қарздорларга тегишли 3 та электромобиль ва 1 та “Howo” юк автомашинаси хатловга олинди.
Жумладан, “Ж.З.” фермер хўжалигининг 427 миллион сўм солиқ қарздорлиги мавжуд бўлиб, қарздорлик бартараф этилмагани сабабли унга тегишли “Volkswagen” русумли электромобиль хатлов қилинди ҳамда аукцион орқали сотилиши ҳақида расман огоҳлантирилди.
Тадбирлар натижасида Қумқўрғон туманида сўнгги икки ҳафтада жами 1 млрд 323 млн сўм солиқ қарздорлиги ундирилиши таъминланди. Бу каби тадбирлар вилоят бўйлаб давом эттирилмоқда.
