Тошкентда кредит қарзи сабаб юк машинаси хатланди
Автомашина 1 млрд сўмлик қарздорлик эвазига хатланиб, сотувга чиқарилган.
МИБнинг Тошкент шаҳар бошқармаси иш юритувида Тошкент туманлараро иқтисодий судининг 2025 йил 22 июлдаги ижро варақасига асосан қарздор “A.U.” МЧЖдан ундирувчи банк фойдасига 1 млрд 266 млн 407 минг 910 сўм қарздорликни ундириш бўйича ижро ҳаракатлари олиб борилмоқда.
Суд қарорига мувофиқ, ундирув қарздор корхонага тегишли бўлган 2 та “HOWO” русумли юк автотранспорт воситаларига қаратилган.
Қарздор томонидан белгиланган ихтиёрий муддатда қарздорлик бартараф этилмагани сабабли давлат ижрочилари томонидан мажбурий ижро ҳаракатлари бошланиб, мазкур автотранспорт воситаларига нисбатан қидирув эълон қилинди.
Қидирув тадбирлари давомида “HOWO” русумли автотранспорт воситаси аниқланиб, жарима майдончасига жойлаштирилди ҳамда белгиланган тартибда хатланди. Шундан сўнг автомашина электрон аукцион савдоларига чиқарилди.
Бироқ, ўтказилган савдоларда автотранспорт воситаси сотилмагани сабабли, амалдаги тартибга мувофиқ унинг бошланғич нархи 25 фоизга арзонлаштирилиб, 731 миллион 250 минг сўм миқдорида қайта савдога қўйилди.
Айни вақтда қолган қарздорликни ундириш ҳамда суд қарорининг тўлиқ ижросини таъминлаш чоралари кўрилмоқда.
