Қурбон ҳайити арафасида эҳтиёжманд аҳолини қўллаб-қувватлаш учун 690 млрд сўм ажратилади

Ўзбекистон Президенти томонидан муборак Қурбон ҳайити муносабати билан аҳолини давлат томонидан қўллаб-қувватлаш ва меҳр-саховат тадбирларини самарали ташкил этишга қаратилган қарор қабул қилинди.

 

Қарорга кўра, Қурбон ҳайити арафасида аҳолининг ижтимоий ҳимояга муҳтож қатламларини қўллаб-қувватлаш, оғир касалликларга чалинган беморларни даволаш ҳамда хайрия ва ободонлаштириш тадбирларини амалга ошириш учун кенг кўламли чоралар кўрилади.

 

Ҳужжат билан Ўзбекистон мусулмонлари идораси, Ижтимоий ҳимоя миллий агентлиги, Соғлиқни сақлаш вазирлиги, Иқтисодиёт ва молия вазирлиги, Ўзбекистон маҳаллалари уюшмаси ҳамда “Вақф” хайрия жамоат фондининг бир қатор таклифлари маъқулланди.

 

Қарорга мувофиқ, оғир ва ногиронликка олиб келувчи касалликларга чалинган 10 минг нафар болада жарроҳлик амалиёти ўтказилади. Шунингдек, 2,3 минг нафар онкологик, гематологик ва онкогематологик ташхис қўйилган беморлар тиббий текширувдан ўтказилиб, уларни даволаш ва операция қилиш харажатлари қопланади.

 

Бундан ташқари, камида 350 нафар беморда жигар ва буйрак трансплантацияси амалиёти ўтказилиши белгиланди.

 

Қарорда ижтимоий ҳимояга муҳтож болаларни қўллаб-қувватлаш чоралари ҳам назарда тутилган. Унга кўра, етим болалар, ота-она қарамоғидан маҳрум бўлган болалар, Меҳрибонлик уйлари, оилавий ва кичик ҳажмли болалар уйлари ҳамда “SOS” болалар маҳалласи тарбияланувчилари, Ватан ҳимояси йўлида ҳалок бўлганларнинг фарзандлари ва “Тaskin Children’s Hospice” болалар онкологик шифохонасида даволанаётган болаларнинг омонат ҳисобварақларига 200 АҚШ доллари миқдорида маблағ ўтказилади.

 

Шунингдек, 500 та масжидда замонавий таҳоратхоналар қуриш, уларни реконструкция қилиш ёки таъмирлаш, қабристонларни ободонлаштириш ишлари амалга оширилади.

 

Қарорда қайд этилишича, тиббий текширув, даволаш ва жарроҳлик амалиётлари Соғлиқни сақлаш вазирлиги томонидан белгиланган тиббиёт муассасаларида амалга оширилади. Бунда донорлар харажатларини қоплаш ҳам кўзда тутилган.

 

Даволаш жараёнларининг тасдиқланган стандартлар ва клиник протоколлар асосида ўтказилиши устидан назорат Давлат тиббий суғуртаси жамғармаси томонидан олиб борилади.

 

Мазкур тадбирлар давлат мақсадли жамғармалари ҳамда қонунчиликда тақиқланмаган бошқа манбалар ҳисобидан ажратиладиган 690 миллиард сўм маблағ эвазига “Вақф” хайрия жамоат фонди орқали молиялаштирилади.

 

Бундан ташқари, Қурбон ҳайити муносабати билан муқаддас қадамжолар, зиёратгоҳлар, масжидлар ва қабристонларни ободонлаштириш, кўнгилли хайрия ҳашарлари ташкил этиш, ижтимоий ҳимояга муҳтож фуқаролар учун эҳсон дастурхонлари ёзиш ҳамда диний таълим муассасалари ва зиёратгоҳларда қурбонлик тадбирларини ўтказиш режалаштирилган.

 

Қарор билан Қорақалпоғистон Республикаси Вазирлар Кенгаши раиси, вилоятлар ва Тошкент шаҳри ҳокимлари бошчилигида ҳудудий кенгашлар ташкил этилади. Ушбу кенгашлар меҳр-саховат тадбирларини манзилли ташкил этиш, масжид ва қабристонларни ободонлаштириш ҳамда қарор ижросида юзага келадиган муаммоларни тезкор бартараф этиш билан шуғулланади.

 

Шунингдек, “Вақф” хайрия жамоат фонди орқали тиббий текширув, операция ва даволаш харажатларини молиялаштириш тартиби ҳам белгиланди. Беморларни даволаш учун йўллаш ва маълумотларни ахборот тизимига киритиш ишлари Соғлиқни сақлаш вазирлиги ҳамда “UZINFOCOM” билан ҳамкорликда амалга оширилади. Кўрсатилган тиббий хизматлар харажатлари эса Давлат тиббий суғуртаси жамғармаси маълумотномаси асосида беш иш куни ичида қопланади.

 

Бундан олдин Рамазон ойи муносабати билан қабул қилинган ПҚ–67-сон қарор доирасида ҳам “Вақф” фондига айрим касалликлар бўйича даволаниш ва операция харажатларини қоплаш ҳуқуқи берилган эди.

 

Дин ишлари бўйича қўмита, Ўзбекистон мусулмонлари идораси ва Ижтимоий ҳимоя миллий агентлиги билан биргаликда Қурбон ҳайити билан боғлиқ хайрия ва мурувват тадбирларининг мазмун-моҳиятини аҳолига кенг тушунтиради.

 

ЎзА ва Миллий телерадиокомпания қарор мазмун-моҳиятини оммавий ахборот воситалари, интернет ва ижтимоий тармоқларда кенг ёритади.

 

Қарор ижросига Бош вазир ўринбосари Жамшид Қўчқоров, Президент маслаҳатчиси ва Ижтимоий ҳимоя миллий агентлиги директори Мансурбек Оллоёров, Президент Администрациясининг Диний-маърифий масалалар бўйича департаменти раҳбари Мухиддин Камилов ҳамда соғлиқни сақлаш вазири Элёр Адилов масъул этиб белгиланди.

 

Қарор ижросини назорат қилиш Бош вазир Абдулла Арипов зиммасига юклатилди.