Ўзбекистонда аккредитациядан ўтган университетлар дипломи энди дунёда ҳам тан олинади

Айни кунларда Лондон шаҳрида бўлиб ўтаётган “Education World Forum 2026” доирасида Ўзбекистон делегацияси халқаро таълим, аккредитация ва сифатни таъминлаш соҳасидаги қатор нуфузли ташкилотлар билан стратегик учрашувлар ўтказмоқда.

Учрашувлар чоғида Ўзбекистон Республикаси Президенти Администрацияси ҳузуридаги Таълим сифатини таъминлаш миллий агентлигининг олий таълимда сифатни таъминлаш соҳасидаги энг йирик халқаро тармоқлардан бири INQAAHE (International Network for Quality Assurance Agenciyes in Higher Education) га тўлиқ аъзолиги расман тасдиқланди, бу ҳақда Агентлик Ахборот хизмати маълум қилади.

INQAAHE 300 дан ортиқ аккредитация ташкилотлари, сифат агентликлари ва экспертларни бирлаштиради. Мазкур аъзолик Ўзбекистон миллий аккредитация тизимининг халқаро стандартларга мувофиқлигини англатади ҳамда мамлакатимизда аккредитациядан ўтган олий таълим муассасалари дипломларининг халқаро миқёсда тан олиниши имкониятларини кенгайтиради.

Бу эса битирувчиларнинг хорижда таълим ва меҳнат фаолиятини давом эттириш, университетларнинг халқаро рейтинг ва грант дастурларида иштирок этиши, икки дипломли ва қўшма таълим дастурларини кенгайтириш, талабалар ҳамда профессор-ўқитувчилар алмашинувини фаоллаштириш учун муҳим асос яратади.

Бундан ташқари аккредитация жараёнларига INQAAHE тармоғи орқали юқори малакали халқаро экспертларни жалб этиш имконияти яратилади, бу эса давлат аккредитацияси сифатини янада оширади.

Мазкур аъзолик Ўзбекистонда таълим сифати, халқаро интеграция ва тан олинувчанликни янги босқичга олиб чиқишда муҳим стратегик аҳамият касб этади.

Таъкидлаш жоизки, Education World Forum доирасида ўтказилган мазкур учрашув ва келишувлар Ўзбекистон таълим тизимида халқаро тан олинувчанлик, сифат, шаффофлик ва рақобатбардошликни янги босқичга олиб чиқишга хизмат қилади.