Ўзбекистондаги коррупция можароси: Beeline инвесторларга компенсация тўлайди
Компания Ўзбекистон телеком бозоридаги фаолияти, коррупция билан боғлиқ хавфлар ва компаниянинг бозор натижалари ҳақида инвесторларга тўлиқ ҳамда ҳаққоний маълумот бермаганликда айблаган.
АҚШ суди Beeline бренди билан танилган VEОN халқаро телекоммуникация компаниясига қарши акциядорлар томонидан киритилган даъво бўйича суддан ташқари келишувни тасдиқлади.
Маълум қилинишича, компания инвесторлар билан 20 миллион доллар миқдоридаги келишувга эришган. Ушбу маблағ даъвогар инвесторлар ўртасида тақсимланади.
Даъвогарлар VEОN'ни Ўзбекистон телеком бозоридаги фаолияти, коррупция билан боғлиқ хавфлар ва компаниянинг бозор натижалари ҳақида инвесторларга тўлиқ ҳамда ҳаққоний маълумот бермаганликда айблаган.
Мазкур иш VEОN'нинг Ўзбекистон бозорига кириш жараёни билан боғлиқ кўп йиллик коррупция можаролари фонида кўриб чиқилди. Аввалроқ АҚШ ва Нидерландия расмийлари томонидан компания фаолияти юзасидан халқаро терговлар ўтказилган эди.
VEОN — Нидерландияда рўйхатдан ўтган халқаро телекоммуникация ва рақамли хизматлар компанияси ҳисобланади. Компания аввал «VimpelCom» номи остида фаолият юритган бўлиб, «Beeline» бренди орқали Россия ва МДҲ давлатларида кенг тармоққа эга бўлган.
Эслатиб ўтамиз, 2016 йилда VEОN Ўзбекистон телеком бозори билан боғлиқ коррупция ишлари юзасидан АҚШ ва Нидерландия расмийлари билан йирик молиявий келишувларга ҳам эришган эди.
