Жиззахда жаримадан қочиб, давлат рақамисиз ҳаракатланган Malibu ҳайдовчиси ушланди
Маълум бўлишича, фуқаронинг банкдан 200 млн қарзи мавжуд. Машина эса узоқ вақт қидирувда бўлган.
Мажбурий ижро бюросининг Жиззах вилояти бошқармаси иш юритувида банк фойдасига 200 миллион сўмдан ортиқ қарздорликни ундириш ҳақидаги ижро ҳужжати мавжуд бўлиб, мазкур иш доирасида узоқ вақтдан буён қидирувда бўлган “Malibu-2” русумли автотранспорт воситасини аниқлаш бўйича тезкор тадбирлар олиб борилди.
Тадбирлар давомида автомашина давлат рақами ечилган ҳолда топилди. Бироқ бу уни яшириш учун етарли бўлмади. Мутахассислар транспорт воситасининг VIN-коди орқали унинг ҳақиқий давлат рақами ва эгасига аниқлик киритишди.
Шундан сўнг автомашина белгиланган тартибда жарима майдончасига жойлаштирилди ва кейинги ижро ҳаракатлари бошланди.Қонунчиликка мувофиқ, суд қарорлари ва ижро ҳужжатларини бажармаслик мол-мулк хатлови, қидирув ва бошқа мажбурий чораларга сабаб бўлади.
