АҚШ “Грин карта” олиш тартибини кескин кучайтирди
Фуқаролик ва Иммиграция хизмати янги қоидалар ноқонуний иммиграцияни камайтиришга хизмат қилишини билдирди.
АҚШ Фуқаролик ва Иммиграция хизмати янги иммиграция қоидаларини эълон қилди. Унга кўра, эндиликда яшил карта олиш учун мурожаат қилаётган шахслар ариза топшириш жараёнида АҚШ ҳудудини тарк этиши ва ҳужжатларни хориждан топшириши керак бўлади.
USCIS баёнотида таъкидланишича, ушбу чоралар доимий яшаш ҳуқуқи рад этилганидан сўнг мамлакатда ноқонуний қолиб кетаётган иммигрантлар сонини камайтиришга қаратилган.
Маълум қилинишича, талабалар, вақтинчалик ишчилар ва сайёҳлар каби ноиммиграцион виза эгалари ташриф мақсади якунлангач АҚШни тарк этиши керак. USCIS вакиллари “АҚШга ташриф яшил карта олишнинг бошланғич босқичига айланмаслиги лозим” эканини таъкидлаган.
Шунингдек, янги тартиб орқали иммиграция ишлари асосан АҚШнинг хориждаги консулликлари орқали кўриб чиқилиши режалаштирилмоқда. Бу эса USCIS ресурсларини фуқаролик олиш, одам савдоси ва зўравонлик қурбонлари учун визалар каби устувор йўналишларга йўналтириш имконини беради.
СNN телеканали маълумотига кўра, янги қоидалар минглаб оилаларнинг ажралишига, иш жойларини йўқотишига ва ҳужжатларни кўриб чиқиш узоқ давом этиши сабабли иммиграцион ноаниқликларнинг кучайишига олиб келиши мумкин.
Бундан ташқари, Трамп маъмурияти томонидан “олтин карта” дастури ҳам ишга туширилган. Мазкур тизимга кўра, аризачилар тезлаштирилган кўриб чиқиш учун 15 минг доллар тўлайди ва кейинчалик АҚШда яшаш ҳамда ишлаш имконини берувчи махсус мақом олиш учун 1 миллион долларлик депозит киритади.
