Бу йил кўп ёмғир ёғди, муаммо аниқ бўлди — Самарқанд вилояти ҳокими

23 май куни Самарқанд вилоятининг қатор ҳудудларида кузатилган кучли ёмғир оқибатида айрим кўчаларда сув тўпланиши ва тошқин ҳолатлари юзага келди. Бу ҳақда вилоят ҳокимлиги ахборот хизмати хабар берди.

 

Маълум қилинишича, вилоят ҳокими Адиз Бобоев вазиятни жойига чиқиб ўрганиш мақсадида тегишли ташкилотлар вакиллари билан биргаликда Самарқанд шаҳридаги Чуқурйўл кўчасида бўлди.

 

Ҳудудда сув тўпланишини бартараф этиш, сув оқизиш тизимини яхшилаш ҳамда бундай ҳолатлар такрорланишининг олдини олиш юзасидан масъулларга топшириқлар берилди.

 

“Яна 4−5 кун ёмғир бор, ёмғир тугаши билан ишни дарҳол бошлайсизлар. Бирданига 4−5 та жойга техника қўямиз, 2 та 1600 талик қувур билан сувни тўлиқ сойга чиқариб юборишимиз керак. Бу нима деган аҳвол? Юришнинг умуман иложи йўқ-ку. Ишни бошлаш керак”, — деди ҳоким.

 

Бундан ташқари ҳоким Самарқанд шаҳрининг Намозгоҳ кўчасига ҳам борди. Қайд этилишича, ушбу ҳудуддан ўтувчи Мароқанд ариғининг йўли турли чиқиндилар ва тиқинлар билан тўсилиб қолган. Бу эса ёмғир сувларининг кўчага тошиб чиқишига сабаб бўлган. Ҳозирда у ерда ҳам тегишли ишлар олиб борилмоқда.

 

Ҳоким масъул идоралар ва коммунал хизматлар вакилларига бундай ҳолатларнинг келгусида такрорланмаслиги учун тизимли чоралар кўриш, айниқса сув оқимлари йўлларини доимий назоратда ушлаш ҳамда сув йўлларини тозалаш ишларини кучайтириш бўйича топшириқлар берди.

 

“Бу йил кўп ёмғир ёғди, муаммо аниқ бўлди. Кейинги йил ҳам шундай бўлиши мумкин. Энди бунақа ҳолат такрорланмаслиги учун шаҳарни бир марта тўлиқ инвентаризация қиласизлар. Қаерда шундай муаммо бўлса, бирорта жой қолмасин. Қанча маблағ керак бўлса, қайта кўриб чиқамиз ва ҳаммасини янгидан қиламиз”, — деди Адиз Бобоев.

 

Маълумотларга кўра, Самарқанд шаҳрида сув тўпланиш ҳолатларини бартараф этиш мақсадида Фавқулодда вазиятлар бошқармасининг сув тортувчи 20 дан ортиқ махсус техникаси жалб этилган.