Хитойдаги кўмир конида юз берган портлашда 90 киши ҳалок бўлди
Портлаш пайтида кон ҳудудида жами 247 нафар ишчи бўлган.
Хитойнинг шимолидаги Шанси провинциясининг Қинюан округида жойлашган «Лушеню» кўмир конида юз берган газ портлаши оқибатида ҳалок бўлганлар сони 90 нафарга етди. Бу ҳақда BBС маълум қилди.
Дастлабки маълумотларга кўра, ҳодиса 22 май куни маҳаллий вақт билан соат 19:29 да содир бўлган. Портлаш пайтида кон ҳудудида жами 247 нафар ишчи бўлган.
Аввалроқ 82 нафар кончи ҳалок бўлгани ва 9 киши бедарак йўқолгани ҳақида хабар берилган эди. Кейинчалик қурбонлар сони яна ортгани маълум қилинган. Ҳозирда қидирув-қутқарув ишлари давом этмоқда.
Хитой раиси Си Цзинпин воқеа юзасидан барча зарур чораларни кўриш, жабрланганларга ёрдам кўрсатиш ҳамда омон қолганларни излаш бўйича барча имкониятларни сафарбар этишга чақирган. Шунингдек, у ҳукуматга авария сабабларини чуқур ўрганиш ва айбдорларни жавобгарликка тортиш бўйича топшириқ берган.
Ваколатли органлар томонидан ҳодиса сабаблари юзасидан тергов ҳаракатлари олиб борилмоқда.
