Навоийда кўп қаватли уй “подвал”ида бассейн қурилгани аниқланди
Ҳолат юзасидан ҳуқуқбузар 20 млн 600 минг сўм жаримага тортилган.
Навоий вилоятида кўп қаватли уйларнинг техник ҳолатини ўрганиш мақсадида ўтказилган назорат тадбирлари давомида Зарафшон шаҳридаги уйларнинг бирида қатор қонунбузилиш ҳолатлари аниқланди. Бу ҳақда Қурилиш ва уй-жой коммунал хўжалиги назорати инспекцияси матбуот хизмати хабар берди.
Маълум қилинишича, Зарафшан шаҳрининг 12-кичик ҳудудида жойлашган кўп қаватли уйлардан бирида мулкдор томонидан биринчи қаватдаги хонадондан подвалга тушиш учун ўзбошимчалик билан йўлак очилган.
Шунингдек, подвал қисми ноқонуний равишда эгаллаб олингани ҳамда хонадон ҳудудида рухсатсиз тарзда бассейн қурилгани аниқланган.
Мутахассислар бундай ноқонуний қурилиш ишлари кўп қаватли уйнинг конструктив мустаҳкамлигига салбий таъсир кўрсатиши, бино техник ҳолатининг заифлашишига олиб келиши ва аҳоли хавфсизлигига бевосита таҳдид туғдириши мумкинлигини таъкидлаган.
Аниқланган ҳолатлар юзасидан ҳуқуқбузар шахсга нисбатан амалдаги тартиб асосида базавий ҳисоблаш миқдорининг 50 баравари миқдорида жарима қўлланилган.
Бундан ташқари, ноқонуний қурилишларни аввалги ҳолатига қайтариш бўйича мажбурий ёзма кўрсатма берилган. Белгиланган муддатда камчиликлар бартараф этилмаса, мажбурий тартибда тегишли чоралар кўрилиши маълум қилинган.
