Тошкентда Тesla'ни  214 км тезликда бошқарган ҳайдовчига чора кўрилди

Тошкент шаҳрида Tesla автомобилини юқори тезликда бошқариб, 214 км/соатгача тезликка чиққан ҳайдовчига нисбатан қонуний чора кўрилди. Бу ҳақда пойтахт ИИББ Ахборот мультимедиа маркази бошлиғи ўринбосари маълум қилди.

 

Ҳолат акс этган видео аввалроқ ижтимоий тармоқларда тарқалиб, кенг муҳокамаларга сабаб бўлган эди. Фойдаланувчилар бундай ҳаракат йўл ҳаракати иштирокчилари ҳаёти учун жиддий хавф туғдиришини таъкидлаб, мутасаддилардан чора кўришни талаб қилган.

 

Маълум қилинишича, автомобиль ҳайдовчиси пойтахт Йўл ҳаракати хавфсизлиги бошқармасининг қидирув бўлими ходимлари томонидан чақиртирилган.

 

Ҳайдовчи ўз мурожаатида юқори тезликда ҳаракатлангани учун пушаймон эканини айтган.

 

“Tesla автомашинасининг эгасиман. Катта тезликда ҳайдаганим ижтимоий тармоқларга тарқалиб кетибди. Шу юзасидан шаҳар қидирув бўлимига чақиришди. Ҳозир қонуний чора кўришяпти. Ҳеч кимга бунақа тез юришни тавсия қилмайман, секин юринглар, эҳтиёт бўлинглар. Қилган ишимдан пушаймонман”, — деди у.

 

Хабарда ҳайдовчига тегишли тартибда чора кўрилгани қайд этилган. Бироқ қандай чора қўлланганига аниқлик киритилмаган.