Японияда ноқонуний мигрантлар ижтимоий тармоқлар орқали назорат қилинади

 

Япония ҳукумати ноқонуний иммиграцияга қарши назорат чораларини кучайтирмоқда. South China Morning Post (SCMP) нашри хабарига кўра, мамлакат Иммиграция хизмати келгуси йилга қадар ижтимоий тармоқлар ва онлайн платформаларни мониторинг қилувчи махсус бўлинма ташкил этишни режалаштирмоқда.

Маълум қилинишича, янги тузилма ноқонуний меҳнат фаолияти билан шуғулланаётган хорижликлар, шунингдек визаси муддати ўтиб кетган ҳолда мамлакатда қолаётган шахслар ҳақида маълумот тўплаш билан шуғулланади.

Расмийлар, айниқса, амалдаги ҳужжатларсиз ишлаётган мигрантларни ёллаётган иш берувчиларга қарши курашишга алоҳида эътибор қаратмоқда. Шу мақсадда хорижий тиллардаги иш эълонлари ва ноқонуний бандликка оид маълумотларни аниқлаш учун замонавий таҳлилий воситалардан фойдаланилиши режалаштирилган.

SCMP маълумотига кўра, Токио шимоли-шарқидаги Ибараки префектурасида ноқонуний иммигрантларни ишга ёллаган компаниялар ҳақида хабар берган шахсларни рағбатлантириш дастури ҳам ишга туширилган. Агар мурожаат асосида қонунбузарлик аниқланса, фуқароларга 10 минг иен миқдорида мукофот берилади.

Қайд этилишича, Япония иқтисодиётида ишчи кучи танқислиги кузатилаётгани сабабли хорижий ишчиларга эҳтиёж ортиб бормоқда. Ҳукумат статистикаларига кўра, мамлакатда қонуний фаолият юритаётган хорижликлар сони 2025 йилда 2,57 миллион кишига етган бўлиб, бу аввалги йилга нисбатан 11,7 фоизга кўпдир.

Шунингдек, Японияга сайёҳлик оқими ҳам ошиб бормоқда. Япония Миллий туризм ташкилоти маълумотларига кўра, 2025 йилда Россиядан келган сайёҳлар сони қарийб 195 минг кишига етган.