Оқ уй америкалик олимларнинг ЖССТ билан алоқасини чекламоқда

 

АҚШ президенти Доналд Трамп маъмурияти Миллий аллергия ва юқумли касалликлар институти ходимларига Жаҳон соғлиқни сақлаш ташкилоти (ЖССТ) билан бевосита алоқа қилишни тақиқлади. Бу ҳақда СNN телеканали ҳужжатлар ва манбаларга таяниб хабар берди.

Маълумотларга кўра, ушбу чекловлар дастлаб ҳантавирус билан боғлиқ эпидемиологик вазият фонида жорий этилган. Кейинчалик Конго Демократик Республикасида Эбола вируси тарқалиши сабаб айрим чекловлар қисман юмшатилган.

Хабарда айтилишича, АҚШ Миллий аллергия ва юқумли касалликлар институтининг айрим ходимларига эндиликда ЖССТнинг виртуал йиғилишларида фақат кичик гуруҳлар таркибида ва тингловчи сифатида қатнашишга рухсат берилган.

СNN маълумотига кўра, ЖССТ билан боғлиқ кейинги барча амалий ҳаракатлар АҚШ Соғлиқни сақлаш ва ижтимоий хизматлар вазирлиги орқали амалга оширилади.

Аввалроқ АҚШ президенти Доналд Трамп мамлакат мутахассислари ҳантавирусни фаол ўрганаётганини маълум қилган эди. Унинг таъкидлашича, америкалик олимлар ушбу вируснинг хусусиятларини яхши билади ва у билан узоқ йиллардан бери шуғулланиб келмоқда.

Шунингдек, Трамп ҳантавирус коронавирусдан фарқли равишда одамдан одамга осон юқмаслигини ҳам қайд этган.