Президент Ўзбекистон халқини Қурбон ҳайити билан табриклади
Шавкат Мирзиёев Қурбон ҳайити муносабати билан хориждаги ватандошларни, дунёнинг турли давлатларидаги мусулмонларни ҳам қутлаб, барчага тинчлик ва фаровонлик тилади.
Ўзбекистон Президенти Шавкат Мирзиёев Қурбон ҳайити муносабати билан мамлакат аҳолисига табрик йўллади.
"Тинчлик, меҳр-оқибат ва саховат байрами – Ийд ал-Адҳа муқаддас динимиз моҳиятида мужассам бўлган эзгу ғоя ва амалларни яққол ифода этган ҳолда, ҳозирги кунда мамлакатимизда инсонпарварлик руҳида олиб борилаётган кенг кўламли ислоҳотларимизнинг маъно-мазмунига уйғун ва ҳамоҳанг экани билан барчамиз учун янада азиз ва қадрли бўлиб бормоқда", дейилади табрикда.
Давлат раҳбари бу йил 15 мингдан зиёд ўзбекистонлик ҳаж амалларини адо этаётгани ҳамда илк бор “Президент ҳожилари” дастури жорий этилганини қайд этди.
Президент ўз табригида Қурбон ҳайити мамлакатда осойишталик, миллатлараро дўстлик ва ҳамжиҳатлик муҳитини мустаҳкамлашда муҳим аҳамият касб этаётганини билдириб, ёрдамга муҳтож инсонлар, нуронийлар, хотин-қизлар ва ёшларни қўллаб-қувватлаш, маҳалла ва хонадонларни обод қилишга қаратилган ишларда байрамнинг эзгу анъаналари илҳом манбаи бўлиб хизмат қилаётганини таъкидлади.
Давлат раҳбари кейинги йилларда Ўзбекистоннинг қадимий тарихи ва бой маданий меросини, буюк аллома ва мутафаккирларнинг илмий-маърифий меросини ҳамда ислом динининг асл моҳиятини ўрганиш ва тарғиб этиш ишлари янги босқичга кўтарилганини қайд этди. Бу борада Тошкентдаги Ислом цивилизацияси маркази, Самарқанддаги Имом Бухорий ёдгорлик мажмуаси ҳамда Марғилондаги Бурҳониддин Марғиноний илмий-маърифий ва туризм мажмуаси Янги Ўзбекистоннинг ноёб обидалари сифатида тилга олинди.
Табрикда қайд этилишича, юртимизда диний эътиқод эркинлигини таъминлаш бўйича яратилган шароитлар туфайли бу йил 15 мингдан ортиқ ватандош ҳаж амалини адо этмоқда.
Шунингдек, тарихда илк бор жорий этилган “Президент ҳожилари” дастури доирасида эл-юртга хизмат қилган 100 нафар уламо, нуроний, маҳалла фахрийлари ва уларнинг оила аъзолари ҳаж сафарига юборилган.
Президент барча ҳожиларни Қурбон ҳайити билан табриклаб, уларнинг ибодатлари қабул бўлишини тилади. Шунингдек, муқаддас зиёратдан қайтадиган ҳожилар жамиятда эзгулик ва маърифат тарғиботчилари сифатида фаол иштирок этишига умид билдирилди.
Давлат раҳбари хориждаги мусулмон давлатлар ва ҳамкор мамлакатларга ҳам табрик йўллаб, уларга тинчлик, равнақ ва фаровонлик тилади.
Шавкат Мирзиёев Қурбон ҳайити муносабати билан бу йил ҳам бир неча кунлик дам олиш кунлари белгиланганини эслатиб, байрам кунлари ҳам хизмат вазифасини бажараётган ҳарбийларга миннатдорлик билдирди.
Шунингдек, чет элларда таҳсил олаётган ва меҳнат қилаётган ватандошларни ҳам самимий табриклади.
Табрик сўнгида президент халқни Қурбон ҳайити билан яна бир бор қутлаб, юрт тинчлиги ва фаровонлиги тилакларини билдирди.
