Россия армияси Киевга тизимли зарбалар беришни бошлайди — Лавров
Лавров ва Рубио Украина можароси ҳамда дипломатик алоқаларни муҳокама қилди.
Россия ташқи ишлар вазири Сергей Лавров ва АҚШ давлат котиби Марко Рубио ўртасида телефон орқали мулоқот бўлиб ўтди. Томонлар Украина можароси, Ҳормуз бўғозидаги вазият ҳамда Россия ва АҚШ дипломатик ваколатхоналари фаолияти масалаларини муҳокама қилди. Бу ҳақда Россия ТИВ хабар берди.
Россия Ташқи ишлар вазирлиги маълум қилишича, суҳбат давомида Сергей Лавров АҚШ томонига Россия Президенти Владимир Путин топшириғига кўра, Киев режимининг Россия ҳудудидаги тинч аҳоли ва фуқаролик объектларига қарши давом этаётган ҳужумларига жавобан Россия Қуролли Кучлари Киевдаги Украина Қуролли Кучлари эҳтиёжлари учун фойдаланилаётган объектлар ҳамда қарор қабул қилиш марказларига тизимли зарбалар беришни бошлаётгани ҳақида маълумот етказган.
Лавров 25 май куни Россия Ташқи ишлар вазирлиги тарқатган баёнотни ҳам эслатиб, унда АҚШ ва Киевда ваколатхоналари мавжуд бошқа давлатларга дипломатик ходимлари ҳамда фуқароларини Украина пойтахтидан эвакуация қилиш тавсия этилганини билдирган.
Шунингдек, Россия томони 2025 йил август ойида АҚШ ташаббуси билан Анкорижда Украина можароси юзасидан эришилган келишувларни эслатиб, Европа элиталари ва Киевнинг ҳаракатлари ушбу келишувларга путур етказаётганини қайд этган.
Суҳбат давомида томонлар Ҳормуз бўғозидаги инқирозни бартараф этишга қаратилган дипломатик ташаббуслар ҳамда Куба атрофидаги вазият юзасидан ҳам фикр алмашган.
Маълум қилинишича, Сергей Лавров ва Марко Рубио мавжуд келишмовчиликларга қарамай, Россия ва АҚШ дипломатик ваколатхоналари фаолияти учун шароитларни нормаллаштириш бўйича саъй-ҳаракатларни кучайтиришга тайёр эканини тасдиқлаган.
