Россия Давлат думаси мамлакатни тарк этган фуқароларнинг мол-мулкини хатлашга рухсат берди
Эндиликда айрим маъмурий ишлар бўйича жаримани ундириш учун хориждаги россияликларнинг банк ҳисоблари ва бошқа активларига чеклов қўйилиши мумкин.
Россия Давлат думаси мамлакатни тарк этган фуқароларнинг мол-мулкини хатлашга рухсат берувчи қонунни қабул қилди. Ҳужжат 26 май куни иккинчи ва учинчи ўқишда бир овоздан маъқулланди. Қонун 1 сентябрдан кучга киради, дея хабар бермоқда DW.
Қонунга кўра, Россиядан чиқиб кетган фуқароларнинг мол-мулки айрим маъмурий ҳуқуқбузарликлар бўйича жарималарни ундиришни таъминлаш мақсадида хатланиши мумкин.
Гап Маъмурий жавобгарлик тўғрисидаги кодекснинг 10 дан ортиқ моддаси ҳақида бормоқда. Улар орасида “хорижий агент” фаолияти қоидаларини бузиш, “экстремистик материаллар”ни тарқатиш, Россия армиясини “дискредитация қилиш”, “номақбул ташкилотлар” фаолиятида иштирок этиш ҳамда “фейклар” тарқатиш билан боғлиқ моддалар бор.
Ҳужжатга мувофиқ, ундирув аввало банк ҳисоблари ва омонатлардаги маблағларга қаратилади. Маблағ етарли бўлмаган тақдирда бошқа мол-мулк хатланади. Шу билан бирга, суд мол-мулкни иш бўйича якуний қарор чиқишидан олдин ҳам хатлашга рухсат бериши мумкин.
Қонунда судья ҳуқуқ-тартибот органларининг мол-мулкни хатлаш ҳақидаги илтимосномасини бир кун ичида ва мулк эгасини хабардор қилмасдан кўриб чиқиши белгиланган.
Аввалроқ Россия парламенти президент Владимир Путиннинг хорижда қуролли кучлардан фойдаланиш ваколатларини кенгайтирувчи яна бир қонунни ҳам қабул қилинган эди. Унга кўра, Россия фуқаролари россияликлар таъқибга учраётган мамлакатларга Кремль қўшин киритиши мумкин бўлади.
