“Тошкент – Самарқанд” янги автомобиль йўлида 60 та тунелли ўтиш жойи қурилади

Президент Шавкат Мирзиёев транспорт инфратузилмасини ривожлантиришга доир тақдимот билан танишиб, “Тошкент – Самарқанд” муқобил автомобиль йўли лойиҳаси ва унинг техник ечимлари юзасидан топшириқлар берди.

 

Тақдимотда қайд этилишича, транспорт инфратузилмаси иқтисодиёт тармоқларини ўзаро боғлаш, ҳудудлар салоҳиятини тўлиқ ишга солиш ҳамда аҳоли ва бизнес учун қулайлик яратишда муҳим аҳамиятга эга. 

 

Шу боис мамлакатда автомобиль йўллари, авиация, логистика ва халқаро транспорт йўлакларини ривожлантиришга алоҳида эътибор қаратилмоқда.

 

Асосий лойиҳа сифатида “Тошкент – Самарқанд” муқобил автомобиль йўли қурилиши кўриб чиқилди. Ушбу йўлнинг умумий узунлиги 282 километр бўлиб, у Тошкент, Сирдарё, Жиззах ва Самарқанд вилоятларини боғлайди.

 

Лойиҳа I-а тоифали, цемент-бетон қопламали ва ҳар икки йўналишда уч тасмали ҳаракат йўлаги сифатида барпо этилиши режалаштирилган. Йўлнинг лойиҳавий тезлиги соатига 150 километрни ташкил этади.

 

Лойиҳа доирасида 12 та транспорт ечими, 60 та туннелли ўтиш жойи, 91 та кўприк, 16 та йўл ўтказгич, 258 та дренаж иншооти ва интеллектуал транспорт тизимини жорий этиш кўзда тутилган. 

 

Бундан ташқари, лойиҳа доирасида 12 та терминал, йўл бўйи инфратузилмаси ва вазн ўлчаш тизимлари ташкил этилиши режалаштирилган.

 

Давлат раҳбари салоҳиятли инвесторлар билан музокараларни жадаллаштириш ҳамда қурилиш ишларини қисқа муддатларда бошлаш бўйича топшириқлар берди.