Туркиядан бувиси томонидан тазйиққа учраган 3 нафар бола Ўзбекистонга қайтарилди
Болалар таълим жараёнидан ажратилиб, уларга фақат диний таълим берилган.
Ўзбекистоннинг Истанбулдаги Бош консулхонасининг маълум қилишича, 12, 10 ва 9 ёшли болалар мунтазам равишда бувиси томонидан жисмоний, руҳий ҳамда маънавий тазйиқларга дучор бўлиб келган. Шунингдек, улар Ўзбекистондаги мажбурий таълим жараёнидан ажратилиб, Туркияга олиб кетилгани, бироқ у ерда ҳам ҳеч бир таълим муассасасига жойлаштирилмагани аниқланган. Болаларнинг фақат диний таълим олгани маълум бўлган.
Ўрганишлар давомида болаларнинг ота-онаси расман ажрашгани, онаси эса Россияда истиқомат қилаётгани аниқланган.
Мазкур ҳолат юзасидан вояга етмаганлар Бош консулхонага олиб келиниб, улар билан психолог иштирокида суҳбат ўтказилган. Суҳбат давомида болаларнинг руҳий ҳолати, яшаш шароити ҳамда кейинги тақдири билан боғлиқ масалалар атрофлича муҳокама қилинган.
Шунингдек, Ўзбекистоннинг тегишли мутасадди идоралари иштирокида ишчи гуруҳ ташкил этилиб, вояга етмаганларга вақтинча васий тайинлаш, уларни Ватанга қайтариш ва таълим жараёнига қайта жалб этиш бўйича зарур чоралар кўрилган.
25 май куни 3 нафар вояга етмаган Ўзбекистон фуқароси масъул ходим кузатуви остида соғ-саломат Ўзбекистонга қайтарилган.
Ҳозирда болаларни тегишли ташкилотлар томонидан кутиб олиш, уларнинг ижтимоий ҳимоясини таъминлаш, таълимга қайта жалб этиш ҳамда қонуний манфаатларини ҳимоя қилиш бўйича тегишли ишлар олиб борилмоқда.
