Ўзбекистонда тадбиркорлар учун солиқлар енгиллашади, текширувлар тартиби соддалаштирилади

2026 йил 1 июндан Ўзбекистонда кичик бизнес учун соддалаштирилган солиқ режими чегараси кенгайтирилиши, бир қатор солиқ енгилликлари жорий этилиши ҳамда текширувлар ва маъмурий жараёнлар қисқартирилиши кутилмоқда. Президент Шавкат Мирзиёев кичик бизнес субъектлари ўсиши учун янада қулай иқтисодий ва маъмурий шароитлар яратишга қаратилган таклифлар тақдимоти билан танишди.

 

Тақдимотга кўра, кичик бизнес учун соддалаштирилган солиқ режими чегараси 1 миллиард сўмдан 5 миллиард сўмга оширилиши режалаштирилмоқда. Бу ўзгариш кўплаб тадбиркорларнинг ҚҚС ва фойда солиғига эрта ўтиш жараёнини енгиллаштириши ҳамда фаолиятни кенгайтириш имконини бериши кутилмоқда.

 

Шунингдек, умумий овқатланиш, савдо ва хизмат кўрсатиш соҳалари учун 6 фоизлик соддалаштирилган ҚҚС тартиби жорий этилиши кўзда тутилган. Паст хавфли тадбиркорлар учун ҚҚС қайтариш жараёни тўлиқ автоматлаштирилади.

 

Амалдаги тартибларга мувофиқ, ҚҚС гувоҳномасини вақтинча тўхтатиш амалиёти бекор қилиниши, солиқ аудити ҳамда сайёр текширувларга чекловлар жорий этилиши режалаштирилмоқда. Бундан ташқари, банк ҳисобварақларини очиш ва айрим молиявий жараёнларни рақамлаштириш чоралари ҳам амалга оширилади.

 

Кичик бизнес субъектларига нисбатан маъмурий босимни камайтириш мақсадида тадбиркорга хатоларни мустақил тузатиш имкониятини бериш ҳамда солиқ хавфи 500 миллион сўмгача бўлган ҳолатларда солиқ аудити, 100 миллион сўмгача бўлганда эса сайёр солиқ текширувини ўтказмаслик тартибини жорий этиш таклиф қилинди.

 

Қайд этилишича, ушбу ислоҳотларнинг асосий мақсади кичик бизнесни “соя” иқтисодиётидан чиқариш, айланмани яшириш эҳтиёжини камайтириш ҳамда тадбиркорлар учун адолатли ва соддалаштирилган бизнес муҳитини яратишдан иборат.

 

Ҳисоб-китобларга кўра, янги енгилликлар 600 мингдан ортиқ кичик бизнес субъектининг қонуний равишда кенгайишига хизмат қилиши кутилмоқда.