Президент қарори асосида 50 га яқин беморда мураккаб операциялар ўтказилди
Қурбон ҳайити муносабати билан ташкил этилган хайрия тадбирлари доирасида болалар ва оғир ташхисли беморларга мураккаб тиббий ёрдам кўрсатилди.
Ўзбекистонда Қурбон ҳайити муносабати билан ўтказилаётган меҳр-саховат тадбирлари доирасида 50 га яқин беморда юқори технологик ва мураккаб жарроҳлик амалиётлари ўтказилди. Бу ҳақда Соғлиқни сақлаш вазирлиги маълум қилди.
Қайд этилишича, Президентнинг аҳолини давлат томонидан қўллаб-қувватлаш ва меҳр-саховат тадбирларини самарали ташкил этишга оид қарори асосида бир қатор беморлар даволанишга жойлаштирилган.
2026 йил 27 май соат 09:00 ҳолатига кўра, 194 нафар бемор бола тиббиёт муассасаларига ётқизилган бўлиб, уларнинг 40 нафарида юқори технологик жарроҳлик амалиёти бажарилган.
Шунингдек, онкологик, гематологик ва онкогематологик ташхис қўйилган 112 нафар бемор даволанишга жойлаштирилган. Уларнинг 5 нафарида мураккаб жарроҳлик операцияси ўтказилган.
Бундан ташқари, 14 нафар бемор тиббиёт муассасаларига ётқизилиб, 2 нафарида жигар ва буйрак трансплантацияси амалга оширилган.
