Саудия Арабистони ҳожиларга тиббий ёрдам кўрсатишда дронлардан фойдаланмоқда
Макка шаҳрида ҳаво ҳарорати 45 даражагача кўтарилган. Ушбу тизим 1,5 миллиондан ортиқ ҳожилар тўпланган гавжум йўллардаги тирбандлик муаммосини камайтиришга ёрдам бермоқда.
Саудия Арабистони ҳаж мавсумида ҳожиларга тиббий хизмат кўрсатишда дронлардан фойдаланмоқда. Бу ҳақда AFP агентлигига таяниб Al-Моnitor хабар берди.
Маълум қилинишича, Макка шаҳрида ҳаво ҳарорати 45 даражагача кўтарилгани сабабли иссиқ уриши билан боғлиқ ҳолатлар кўпайган. Шу боис мамлакат соғлиқни сақлаш хизмати тиббий марказларни зарур воситалар билан тезкор таъминлаш учун учувчисиз учар қурилмаларни ишга солган.
Дронлар Макка, Мино ва Арафот ҳудудларидаги 127 та клиникага дори-дармон ва бошқа тиббий воситаларни етказиб бермоқда. Саудия расмийларига кўра, ушбу тизим 1,5 миллиондан ортиқ ҳожилар тўпланган гавжум йўллардаги тирбандлик муаммосини камайтиришга ёрдам бермоқда.
Миллий ягона харид компанияси (NUPCO) бош операцион директори Фаҳд Ал-Батҳи АФПъга берган изоҳида ҳаж мавсумидаги тиббий эҳтиёжларга тайёргарлик ишлари тўққиз ой аввал бошланганини айтди.
Унинг сўзларига кўра, дронлар жорий этилишидан аввал ҳайдовчилар тиббий воситалар камайиб қолган клиникаларга етиб бориш учун баъзан бир соатдан ортиқ вақт сарфларди.
Саудия Арабистони ҳаж мавсумида бошқа замонавий технологияларни ҳам қўлламоқда.
Жумладан, Макка ва унинг атрофидаги минглаб кузатув камераларидан олинган тасвирларни назорат қилишда сунъий интеллектдан фойдаланилмоқда.
Шунингдек, жазирама иссиқка қарши улкан вентиляторлар, бепул сув тарқатиш пунктлари ва нам пуркаш тизимлари ишга туширилган.
Саудия соғлиқни сақлаш тизими вакили Жамил Абу Ал-Айнайннинг таъкидлашича, ҳаж мавсумида иссиқдан ҳолсизланиш асосий муаммолардан бири ҳисобланади. Унинг айтишича, хизматлар юқори тайёргарлик ҳолатида фаолият юритмоқда.
