АҚШда 2026 йил бошидан буён 5 мингдан ортиқ одам отишмалар оқибатида ҳалок бўлди
Йил бошидан буён мамлакатда 158 та оммавий отишма ҳолати қайд этилди.
Қўшма Штатларда 2026 йил бошидан буён содир бўлган отишма ҳодисалари оқибатида 5 мингдан ортиқ одам ҳалок бўлган. Бу ҳақда “Gun Violence Archive” нодавлат ташкилоти маълумот берди, дейди ТАСС.
Қайд этилишича, 26 май ҳолатига кўра, мамлакат бўйлаб ўқотар қуроллар билан боғлиқ ҳодисаларда 9038 киши турли даражадаги жароҳатлар олган, 5048 киши эса вафот этган.
Ташкилот ҳисоб-китобларига кўра, 2026 йил давомида АҚШда 158 та оммавий отишма ҳолати қайд этилган. Бу кўрсаткич ўтган йилнинг шу даврига нисбатан 38 тага кам экани таъкидланди.
Эслатиб ўтамиз, 23 май куни кечқурун Вашингтондаги Оқ уй яқинида ҳам отишма содир бўлган эди. Маълумотларга кўра, бир шахс сумкасидан қурол чиқариб, хавфсизлик назорат пункти яқинида ўт очган.
Махфий хизмат ходимлари жавоб тариқасида қурол ишлатган. Ҳужумчи касалхонага олиб кетилган, бироқ кейинчалик вафот этган.
