Эрдоған Нетаняхуни “золим” деб атади
Туркия президенти мусулмон дунёси Нетаняхуга “тегишли сабоқ” беришини билдирди.
Туркия президенти Режеп Таййип Эрдоған Исроил бош вазири Бинямин Нетаняхуни Ғазо секторидаги можаро сабаб кескин танқид қилди. Бу ҳақда у Қурбон ҳайити муносабати билан халққа йўллаган мурожаатида маълум қилган, деб хабар берди Anadolu.
Эрдоған Ғазодаги вазият нафақат Туркия, балки бутун мусулмон дунёсининг байрам кайфиятига салбий таъсир кўрсатаётганини таъкидлаган.
“Нетаняху номи билан танилган золим бутун мусулмон дунёсидан тегишли сабоқ олишига ишонаман”, — дея таъкидлаган Туркия раҳбари.
Маълум қилинишича, 2025 октябрь ойида Исроил ва ҲАМАС ҳаракати ўртасида Ғазо секторида сулҳга эришилган эди. Бироқ томонлар келишувнинг иккинчи босқичи юзасидан ҳануз муросага кела олмаяпти.
Ушбу босқич ҲАМАСни қуролсизлантириш ва Исроил қўшинларини анклав ҳудуддан олиб чиқишни назарда тутади. Шу билан бирга, Исроил бош вазири Бинямин Нетаняху мамлакат Ғазо секторининг қарийб 60 фоиз ҳудудини назорат қилаётганини билдирган. 27 май куни эса Исроил мудофаа кучлари бир ҳафта аввал ҲАМАСнинг жангари қаноти раҳбари йўқ қилинганини маълум қилган.
