Россия ва Хитой учун Ҳормуз бўғозидан ўтишда алоҳида шароитлар сақлаб қолинади

Эрон парламентининг Миллий хавфсизлик ва ташқи сиёсат қўмитаси раҳбари Иброҳим Азизи Россия ва Хитой Ҳормуз бўғози орқали ўтишда алоҳида ёндашув ва қулай шароитлардан фойдаланишда давом этишини билдирди. Бу ҳақда Иброҳим Азизи РИА Новости агентлигига берган интервьюсида маълум қилди.

 

“Биз учун стратегик аҳамиятга эга давлатлар, жумладан Хитой ва Россия, бундан кейин ҳам Ҳормуз бўғози билан боғлиқ масалаларда алоҳида ёндашув ва қулай шароитлардан фойдаланади”, — деди Азизи.

 

Унинг сўзларига кўра, мазкур ёндашув савдо кемалари билан бир қаторда нефть танкерларига ҳам татбиқ этилади. Эрон расмийси Россия ва Хитойни Теҳроннинг энг яқин ҳамкорлари сифатида тилга олиб, бу давлатлар Эронни энг мураккаб даврларда ҳам қўллаб-қувватлаб келганини таъкидлади.

 

Азизининг қайд этишича, Ҳормуз бўғози Эрон учун алоҳида геосиёсий аҳамиятга эга. У бўғоз мамлакатнинг ҳудудий сувлари ва географик маконининг бир қисми эканини айтиб, Теҳрон у билан боғлиқ ҳар қандай қарорни мустақил равишда қабул қилиш ҳуқуқига эгалигини билдирган.

 

Ҳормуз бўғози дунёдаги энг муҳим нефть ташиш йўлакларидан бири ҳисобланади. Жаҳон бозорига етказиб берилаётган нефтнинг катта қисми айнан ушбу бўғоз орқали ташилади.

 

РИА Новости мақоласида қайд этилишича, АҚШ ва Исроилнинг Эрон Ислом Республикасига қарши ҳарбий операциясидан сўнг Теҳрон бўғоз акваториясини ёпган. Натижада дунёнинг кўплаб мамлакатларида ёқилғи ва саноат маҳсулотлари нархлари ошган.

 

Шу билан бирга, Ҳормуз бўғозини қайта очиш масаласи АҚШ ва Эрон ўртасида можарони якунлашга қаратилган эҳтимолий келишувнинг муҳим бандларидан бири сифатида муҳокама қилинмоқда.