Зеленский Европа Иттифоқи билан биргаликда 120 шахс ва ташкилотга қарши чекловларни кучга киритди

Украина президенти Владимир Зеленский икки фармонни имзолаб, Миллий хавфсизлик ва мудофаа кенгашининг Европа Иттифоқи санкциялари билан мувофиқлаштириш тўғрисидаги қарорини кучга киритди. Бу ҳақда Украина президенти девони маълум қилди.

 

Расмий баёнотга кўра, Европа Иттифоқининг 20-санкция пакети доирасида амалга оширилган мувофиқлаштириш 120 нафар шахс ва ташкилотни қамраб олади ҳамда Россия иқтисодиётининг асосий тармоқларига йўналтирилган иқтисодий чекловларни ўз ичига олади.

 

Қайд этилишича, янги санкциялар Россия, Беларус, БАА, Қирғизистон, Қозоғистон, Ўзбекистон ҳамда Россия томонидан босиб олинган ҳудудларда фаолият юритаётган жами 16 нафар жисмоний шахс ва 31 та компанияга нисбатан қўлланилади. Шунингдек, Эроннинг 19 нафар фуқароси ва 11 та компанияси ҳам санкциялар рўйхатига киритилган.

 

Санкциялар рўйхатига Россиянинг стратегик корхоналари раҳбарлари, бюджет муассасалари вакиллари, армиянинг айрим бўлинмалари ҳамда вақтинча босиб олинган ҳудудларда Россия манфаатларига хизмат қилаётган шахслар киритилган.

 

Бундан ташқари, рўйхатдан Россия ҳарбий-саноат мажмуаси корхоналари, радиоэлектрон кураш тизимлари ишлаб чиқарувчилари, дронлар учун дастурий таъминот ва эҳтиёт қисмлар ишлаб чиқарувчи компаниялар, шунингдек нефть, газ ва олтин қазиб олиш билан шуғулланувчи корхоналар ҳам ўрин олган.

 

Хусусан, аэрокосмик маҳсулотлар ва дрон компонентлари ишлаб чиқарувчи “Атлант Aero” ҳамда алоқа тизимлари ва BPLA учун эҳтиёт қисмлар ишлаб чиқарувчи “ИРЗ-Связ” компанияларига нисбатан чекловлар жорий этилган.

 

Шунингдек, БААдаги айрим компаниялар — лаборатория ускуналари, кимёвий маҳсулотлар ҳамда тижорат самолётлари учун эҳтиёт қисмлар етказиб берувчи ташкилотлар ҳам санкциялар остига тушган. Беларусдаги нефть экспорт қилувчи компанияга ҳам чекловлар қўлланилган.

 

Украина уч нафар Россия фуқаросига ҳам санкциялар жорий қилди. Улар орасида прокурор Людмила Баландина, судья Дмитрий Гордеэв ҳамда тарғиботчи Мария Ситтел бор. Улар репрессиялар ва дезинформация тарқатиш билан боғлиқ фаолиятда айбланган.

 

Шунингдек, Эроннинг 19 фуқароси ва 11 компанияси ҳам санкциялар рўйхатига киритилган бўлиб, улар Эроннинг баллистик ракеталар ва дронлар ишлаб чиқариш дастурлари билан боғлиқ фаолият юритади.

 

Украина президентининг санкциялар сиёсати бўйича вакили Владислав Власюкнинг айтишича, Киев Европа Иттифоқи ва ҳамкорлар билан санкция режимларини уйғунлаштиришни давом эттирмоқда ҳамда Россия ва уни қўллаб-қувватлаётганларга босимни кучайтириш режалаштирилган. У, шунингдек, Европа Иттифоқининг 21-санкция пакети устида ҳам иш олиб борилаётганини билдирган.