Шавкат Мирзиёев Туркиядаги автобус ҳалокати муносабати билан Эрдоғанга ҳамдардлик билдирди
Денизли вилоятида йўловчи автобуси иштирокидаги ҳалокат оқибатида 8 киши ҳалок бўлди, 33 киши жароҳатланди.
Ўзбекистон президенти Шавкат Мирзиёев Туркиянинг Денизли вилоятида содир бўлган йўл-транспорт ҳодисаси оқибатида инсонлар ҳалок бўлгани ва жароҳатлангани сабаб Туркия президенти Режеп Таййип Эрдоғанга ҳамдардлик йўллади. Бу ҳақда Ўзбекистон президенти матбуот котиби хабар берди.
Давлат раҳбари ҳалок бўлганларнинг оила аъзолари ва яқинларига чуқур таъзия билдириб, жабрланганларнинг тез фурсатда соғайиб кетишини тилаган.
Фожиа Денизли вилоятининг Сарайкўй туманида юз берган. Йўловчи автобусининг йўл тўсиғига урилиши ортидан транспорт воситасида ёнғин келиб чиққан.
Туркия ОАВлари маълумотларига кўра, ҳодиса оқибатида 8 киши, жумладан 9 ойлик чақалоқ ҳалок бўлган, яна 33 киши турли даражада тан жароҳати олган.
Дастлабки маълумотларга кўра, автобус ҳайдовчиси ҳалокатдан тахминан 20 дақиқа олдин транспорт воситасидаги носозлик сабаб йўл четида тўхтаб, техник ҳолатини текширган. Шундан сўнг сафарни давом эттирган, бироқ кўп ўтмай автобус ҳалокатга учраган.
