1 cентябрдан фильмлар рекламаси учун бюджетнинг 30 фоизигача маблағ берилади

 

Президент Шавкат Мирзиёевнинг маданият ва санъат соҳаси вакиллари билан учрашувида кино саноатини ривожлантириш ва бошқарув тизимини такомиллаштиришга қаратилган қатор янги ташаббуслар эълон қилинди.

 

Қайд этилишича, жорий йилнинг 1 cентябридан бошлаб давлат буюртмаси асосида яратиладиган фильмларнинг тарғибот ва реклама харажатлари учун лойиҳа бюджетининг 30 фоизигача маблағ ажратилади. Шунингдек, бундай лойиҳалар бўйича харид шартномаларини экспертизадан ўтказиш талаби бекор қилинади.

 

Янги тартибга кўра, хорижий компанияларнинг Ўзбекистон ҳудудида кино маҳсулотлари яратиш билан боғлиқ фаолияти солиқлардан озод этилади.

 

Давлат буюртмаси асосида суратга олинган фильмлар намойишидан тушган маблағнинг 50 фоизи продюсерлар ва ижодий жамоаларга қўшимча рағбат сифатида йўналтирилади.

 

Шунингдек, Ўзбекистон киноарбоблари ижодий уюшмаси томонидан ўтказиладиган “Олтин ҳумо” миллий кино тақдимотининг нуфузини ошириш мақсадида ҳар йили 5 миллиард сўм маблағ ажратилиши белгиланди.

 

Учрашувда Республика кинематография комиссияси ҳамда Миллий ва Бадиий кенгашлар фаолияти танқид қилиниб, уларнинг эскича бошқарув ва самарасиз назорат тизимидан воз кеча олмагани қайд этилди. Шу муносабат билан мазкур комиссия ва кенгашлар фаолиятини тугатиш таклифи илгари сурилди.

 

Эндиликда кино жанри ва мавзусидан келиб чиқиб, тегишли йўналиш мутахассисларидан иборат ҳақ тўланадиган эксперт гуруҳлари шакллантирилади. Ушбу гуруҳлар таркибига Ўзбекистон киноарбоблари ижодий уюшмаси, Ёзувчилар уюшмаси ва Бастакорлар уюшмаси тавсия этган мутахассислар киритилади.

 

Мутасаддиларга кино соҳасида замонавий, очиқ ва шаффоф бошқарув тизимини жорий этиш бўйича таклифлар ишлаб чиқиш топширилди.