Ҳар йили 1 минг нафар ижодкорга ипотека кредити дастлабки тўловининг 50 фоизи қоплаб берилади

 

Президент Шавкат Мирзиёевнинг маданият ва санъат соҳаси вакиллари билан учрашувида адабиёт, маданият ва санъат ходимларини қўллаб-қувватлашга қаратилган қатор янги ташаббуслар эълон қилинди.

 

Қайд этилишича, шоир ва ёзувчилар учун муносиб ижодий муҳит яратиш мақсадида йилига камида 50 та энг сара асарга ижодий буюртма берилади. Шунингдек, ҳар йили ўзбек адабиётининг энг яхши 10 та асари хорижий тилларга таржима қилиниб, муаллифлар иштирокида чет давлатларда тақдимотлари ташкил этилади.

 

Янги тартибга кўра, Ўзбекистон Ёзувчилар уюшмаси тавсияси асосида чоп этиладиган китобларнинг қоғоз харажатлари давлат томонидан қопланади.

 

Учрашувда ёш истеъдодларнинг шеърият ва санъатни уйғунлаштирган шеърий концертлар ташкил этиш ташаббуслари ҳам қўллаб-қувватланди. Ушбу йўналишдаги энг сара 100 та лойиҳа давлат маблағлари ҳисобидан молиялаштирилади.

 

Шунингдек, ҳар бир вилоятда йил якунига қадар чекка ва олис ҳудудлардаги 50 тадан 100 тагача маҳаллада намунали кутубхона ва китоб дўконлари ташкил этилади.

 

Ижодкорларни ижтимоий қўллаб-қувватлаш мақсадида ҳар йили 1 минг нафар шоир ва ёзувчи, маданият ва санъат вакили, музей ходими ҳамда рассомларга уй-жой олиш учун ипотека кредитининг дастлабки тўловининг 50 фоизи қоплаб берилади.

 

Бундан ташқари, бошқа ҳудуддан келиб ишлаётган соҳа вакилларига уй-жой ижараси харажатлари учун Тошкент шаҳрида ойига 2,5 миллион сўмгача, вилоятларда эса 1,6 миллион сўмгача компенсация тўланади.

 

Янги тизимга мувофиқ, ҳар йили фаолиятида юқори натижаларга эришган 1 минг нафар соҳа ходими давлат тиббий суғурта жамғармаси ҳисобидан бепул даволанади. Яна 2 минг нафар ижодкорга тиббий суғурта пакети тақдим этилади. Камида 10 йил ишлаган ходимларга эса санаторийларга бепул йўлланмалар берилади.

 

Шунингдек, 15 июндан бошлаб халқ артисти, халқ шоири ва халқ ёзувчиси каби юксак фахрий унвонларга эга ижодкорларнинг аэропорт ва вокзаллардаги VIP заллардан бепул фойдаланиши таъминланади.