Олийгоҳларда дарс берадиган таниқли ижодкорларга 50 фоизгача устама тўланади
Талабалар стартаплари учун 10 та олийгоҳга 50 миллиард сўм ажратилади.
Президент Шавкат Мирзиёевнинг маданият ва санъат соҳаси вакиллари билан учрашувида олий таълим тизимини такомиллаштириш, ижодий ёшларни қўллаб-қувватлаш ва соҳада замонавий таълим механизмларини жорий этишга қаратилган янги ташаббуслар илгари сурилди.
Қайд этилишича, маданият ва санъат йўналишидаги 10 та олийгоҳ ректорлари ҳар бир талаба билан индивидуал ишлаш, уларнинг шахсий брендини шакллантириш, ижодий маҳсулотларини тижоратлаштириш ҳамда ҳамкорлик имкониятларини кенгайтиришга алоҳида эътибор қаратиши зарур.
Янги ўқув йилидан бошлаб ҳар бир талабага таниқли ижодкорлар бириктирилиб, дуал таълим тизими йўлга қўйилади. Ушбу тизим доирасида устоз ижодкорлар талабаларнинг концерт, театр ва бошқа саҳна чиқишларида иштирокини таъминлаб, уларни амалий тажриба асосида тайёрлаб боради.
Бунда устоз ижодкорларга олийгоҳ профессор-ўқитувчилари билан тенг миқдорда ҳақ тўланади. Олийгоҳларда дарс берадиган таниқли ижодкорларга эса қўшимча 50 фоиз устама белгиланиши режалаштирилмоқда.
Таълим дастурларига «Арт-менежмент», “Креатив индустрия”, “Лойиҳаларни тижоратлаштириш” каби замонавий фанлар киритилади. Шунингдек, киноиндустрия, мода ва дизайн, маданият менежменти йўналишларида хориждан 50 нафар тажрибали мутахассис жалб этилади.
Талабаларнинг стартап лойиҳаларини қўллаб-қувватлаш мақсадида 10 та олийгоҳга жами 50 миллиард сўм маблағ ажратилади.
Шунингдек, Консерватория ҳузуридаги марказ ҳамда Санъат ва маданият институти таркибидаги марказлар негизида Маданият вазирлиги тизимида соҳа ходимларининг малакасини ошириш ва қайта тайёрлаш институти ташкил этилади.
