Россияда 5 ёшли қизни зўрламоқчи бўлган педофилни болалар тўхтатиб қолди

 

Россиянинг Тюмен шаҳрида 5 ёшли қизга нисбатан жинсий зўравонлик ҳаракатларини содир этишга уринганликда айбланаётган 44 ёшли эркак суд қарори билан ҳибсга олинди. Бу ҳақда РEН ТВ хабар берди.

 

Тергов маълумотларига кўра, ҳодиса 28 май куни содир бўлган. Гумонланувчи қизалоқни куч ишлатиб кўп қаватли уй кириш йўлагига олиб кирган ва унга нисбатан жинсий характердаги зўравонлик ҳаракатларини содир этишга уринган.

 

Вилоят судлари қўшма матбуот хизматининг маълум қилишича, эркакка Россия Жиноят кодексининг вояга етмаган шахсга нисбатан жинсий дахлсизликка қарши жиноятларни назарда тутувчи моддаси бўйича айблов эълон қилинган. Суд унинг эҳтиёт чораси сифатида 28 июлгача тергов ҳибсхонасида сақланиши ҳақида қарор чиқарган.

 

Қайд этилишича, эркак суд мажлисида айбини тан олиб, қилмишидан пушаймон эканини билдирган ҳамда уй қамоғини қўллашни сўраган.

 

Эркакнинг жиноий ҳаракатлари икки нафар ўсмирнинг ҳушёрлиги туфайли тўхтатилган. Воқеани пайқаган болалар яқин атрофдаги аёлни ёрдамга чақирган. Аёл дарҳол воқеа жойига етиб бориб, қизалоқни қутқариб қолган.

 

Ҳодиса юзасидан жиноят иши қўзғатилган, тергов ҳаракатлари давом этмоқда.