Саида Мирзиёева БМТнинг Гиёҳванд моддалар ва жиноятчилик бўйича бошқармаси раҳбари билан учрашди
Томонлар аёллар, болалар ва ёшларни ҳимоя қилишга қаратилган тадбирлар юзасидан ҳам фикр алмашди.
Венада Ўзбекистон Президенти ёрдамчиси Саида Мирзиёева БМТ Бош котиби ўринбосари ва БМТнинг Гиёҳванд моддалар ва жиноятчилик бўйича бошқармаси (БМТ ГЖБ) ижрочи директори этиб янги тайинланган Моника Жума билан учрашув ўтказди.
Саида Мирзиёеванинг маълум қилишича, музокаралар чоғида Ўзбекистоннинг БМТ ГЖБ билан ҳамкорлиги, гиёҳвандлик таҳдидларига қарши курашиш масалалари ҳамда 2026 йил апрель ойида Самарқанд шаҳрида ушбу глобал муаммога бағишлаб ўтказилган халқаро форум якунлари ва ундан кейинги амалий ишлар муҳокама қилинган.
Шунингдек, томонлар аёллар, болалар ва ёшларни ҳимоя қилишга қаратилган тадбирлар юзасидан ҳам фикр алмашган. Саида Мирзиёева Моника Жумага Ўзбекистон томонидан БМТ Жиноятчиликнинг олдини олиш комиссиясининг 35-сессияси доирасида ташкил этилган махсус тадбирни қўллаб-қувватлагани учун миннатдорлик билдирган.
“Биз БМТ ГЖБ билан хавфсизлик, адолат ва барқарор тараққиёт борасида шерикликни янада ривожлантиришга тайёрмиз”, дея ёзди Мирзиёева.
