Саида Мирзиёева Вена шаҳрида БМТ сессиясида миллий маъруза билан иштирок этди
Мирзиёева кибержиноятчилик, коррупция ва оилавий зўравонлик чегара билмаслигини уларга қарши халқаро ҳамкорлик орқали курашиш зарурлигини таъкидлади.
Австриянинг Вена шаҳрида БМТнинг Жиноятчиликнинг олдини олиш ва жиноий одил судлов комиссиясининг 35-сессияси бўлиб ўтди. Унда дунёнинг 175 давлатидан 1,5 мингдан ортиқ юқори мартабали раҳбар ва экспертлар иштирок этди. Бу ҳақда Саида Мирзиёева хабар берди.
Сессия доирасида Саида Мирзиёева миллий маъруза билан сўзга чиқди. Президенти администрацияси раҳбари ўз нутқида Ўзбекистонда одил судловни таъминлаш, аёллар ва болалар ҳуқуқларини ҳимоя қилиш, жиноятчилик профилактикаси ҳамда ёшларни қўллаб-қувватлаш йўналишларида амалга оширилаётган ислоҳотлар ҳақида маълумот берди.
Саида Мирзиёеванинг таъкидлашича, кибержиноятчилик, коррупция ва оилавий зўравонлик каби таҳдидлар давлат чегараларини тан олмайди. Шу боис уларга қарши курашишда очиқ мулоқот, тажриба алмашиш ва халқаро ҳамкорликни кучайтириш муҳим аҳамият касб этади.
Қайд этилишича, Ўзбекистон жорий йилда илк бор БМТнинг мазкур нуфузли тузилмасига аъзо бўлди.
