Тошкентда электр подстанцияси ёниб кетди

Тошкент шаҳрининг Олмазор туманида жойлашган электр подстанцияси портлагани ҳақида хабарлар тарқалди. Ҳолат юзасидан Тошкент шаҳар ФВБ расмий маълумот берди.

 

Маълум қилинишича, 1 июнь куни соат 18:57 да Олмазор тумани Кичик ҳалқа йўли кўчасида жойлашган подстанция ҳудудида трансформатор ёнаётгани ҳақида хабар келиб тушган.

 

Шундан сўнг ёнғин-қутқарув экипажлари воқеа жойига соат 19:01 да етиб борган. Ёнғин соат 19:12 да қуршаб олиниб, 19:17 да тўлиқ ўчирилган.

 

Дастлабки маълумотларга кўра, ҳодиса оқибатида тан жароҳати олганлар йўқ. Вазият Тошкент шаҳар Фавқулодда вазиятлар бошқармаси томонидан назоратга олинган.

 

“Ўзбекистон миллий электр тармоқлари" АЖга кўра, 110 кВ кучланишли "Вистовочная" подстамсиясида мазкур носозлик сабабли ушбу энергетика объектидан чиқувчи 6 кВ қурилмаларга уланган тармоқлар кучланишсиз қолган.

 

Натижада Шайхонтоҳур ва Олмазор туманининг айрим ҳудудлари истеъмолчиларида электр таъминотида узилишлар кузатилмоқда.

 

Махсус бригада носозлик сабабини аниқлаш ва уни бартараф этиш ишлари билан шуғулланмоқда.