Янги ўқув йилидан 326 та санъат мактаблари педагоглари умумтаълим мактаблари билан тенг маош олади

 

Президент Шавкат Мирзиёевнинг маданият ва санъат соҳаси вакиллари билан учрашувида мусиқа ва санъат таълимини ривожлантириш ҳамда иқтидорли ёшларни қўллаб-қувватлашга қаратилган янги ташаббуслар эълон қилинди.

 

Қайд этилишича, янги ўқув йилидан бошлаб республикадаги 326 та мусиқа ва санъат мактаби ўқитувчиларининг иш ҳақи умумтаълим мактаблари педагоглари билан тенглаштирилади.

 

Шунингдек, умумтаълим ва мусиқа мактаблари ўқитувчиларига ўқувчиларнинг мусиқа асбобларини ижро этиш маҳоратидан келиб чиқиб, иш ҳақига 20 фоизгача устама тўлаш тизими жорий этилади.

 

Янги ўқув йилида камида 1,5 миллион нафар ўқувчини мусиқа ва санъатга жалб қилиш вазифаси белгиланди. Шу мақсадда 326 та мусиқа ва санъат мактаби ҳамда 29 та ихтисослаштирилган мактаб билан умумтаълим муассасалари ўртасида ижодий ҳамкорлик йўлга қўйилади.

 

Бундан ташқари, ҳар йили театр, чолғу, хор ва рақс йўналишлари бўйича умумтаълим мактаблари ўртасида туман, вилоят ва республика босқичларида танловлар ўтказилади. Ушбу танловлар ғолибларини қўллаб-қувватлаш, саҳна декорациялари, либослар ва мусиқа асбоблари харид қилиш учун 500 миллион сўмгача грант маблағлари ажратилади.

 

Шунингдек, республика танловлари ғолибларига маданият ва санъат йўналишидаги олий таълим муассасаларига ўқишга киришда алоҳида имкониятлар яратилади ҳамда улар олийгоҳларга қабул қилинади.