АҚШ бошпана сўраш аризаларини кўриб чиқиш тартибини кучайтирмоқда
Ҳозирда 1 миллиондан ортиқ кўриб чиқилмаган бошпана аризалари мавжуд бўлиб, янги тартиб орқали ҳукумат жараённи тезлаштиришни мақсад қилган.
АҚШ маъмурияти бошпана сўраб мурожаат қилувчиларга нисбатан қўлланиладиган тартибларни янада қатъийлаштиришни режалаштирмоқда. Бу ҳақда CBС телеканали хабар берди.
Маълумотларга кўра, ишлаб чиқилаётган янги қоидаларга биноан АҚШ Фуқаролик ва иммиграция хизматлари (USCIS) ходимлари айрим бошпана аризаларини ариза берувчи билан алоҳида суҳбат ўтказмасдан рад этиш ҳуқуқига эга бўлиши мумкин.
Лойиҳада қайд этилишича, агар чет эл фуқароси мамлакат ҳудудига кирганидан кейин бир йилдан ортиқ вақт ўтгач бошпана сўраб мурожаат қилса ва қонунчиликда назарда тутилган истисно ҳолатларни тасдиқловчи ҳужжатларни тақдим этмаса, унинг аризаси рад этилиши мумкин.
Бундай ҳолларда мурожаатчилар иммиграция судига юборилади ва уларнинг иши депортация жараёнлари доирасида кўриб чиқилади.
АҚШ расмийларининг таъкидлашича, мазкур ташаббус иммиграция тизимидаги ортиқча юкламани камайтириш ҳамда кўриб чиқилиши кутилаётган аризалар сонини қисқартиришга қаратилган. Ҳозирда мамлакатда 1 миллиондан ортиқ бошпана аризаси навбатда қолмоқда.
Мутахассислар фикрича, янги қоидалар қабул қилинса, бошпана олиш жараёнига қўйиладиган талаблар сезиларли даражада кучайиши ва иммиграция тизимининг ишлаш тартибига жиддий таъсир кўрсатиши мумкин.
